وكعادة المذيع الشهير أسامه منير نبدأ موضوعنا
الكدب
الكدب ده شيئ خطير جدا ... وايه الدوافع اللى تخلينا نكدب؟؟
وازاى نعرف ونتجنب الشخصيه الكدابه؟؟؟
ونوصل للنقطه المهمة الكدب فى الحب
ايه الدافع اللى يخلى الحبيب يكدب على حبيبته .؟؟؟؟
او خطيبته .. وليه البنت بتضطر تكدب فى بعض المواقف
ويبقى ايه شعورك لما تعرف ان حبيبك كدب عليك
وهل هتسامحه ولا لأ .. اسأله كتيره نجاوبها سوى
ودلوقتى مع
شيرين ... انا مش هفضل كده على طول
كان زماااااان تسمع ان ناس قاطعت واحد عشان كداب
وتلاقى الأطفال بتزفه ... الكداب اهو .. الكداب اهو
ده غير الأطفال السئيله بقى تلاقيه طول النهار قاعد وبيقول
ياكداااااااب .. ويطلع فى لسانه
بس دلوقتى ومع تقدم التكنولجيا
وظهور حركات تحرير الشعوب والديموقراطيه
بقى الكدب سلوك عادى جدا .. ونشوف ونحكم بنفسنا
نبدأ بالتلفزيون ؟؟؟
واحده ست من الريف جايبنها وقدامها كوم غسيل
سبحان الله لابينضف ولا بيخلص
لغايه مابتكتشف المسحوق الخارق بقوة الكاوتشى الباتا
وسبحان الله الهدوم بدون مقدمات نضفت
وبعدها صوت بيجى
دى نضافة امبارح... ودى نضافة المدعوء العادى
ودى نضافة الفيل ابو زلومه
ودهب دهب دهب ..دددددددهب دهب ..
ويتوالى مسلسل الكدب والاستخفاف بعقول الغلابة
وبعيدا عن مأساة 0900 0900
وشبكة واحده بتقربنا كلنا ..
وكلام المظاهرات اللى بيقدم ولا بيأخر
واعلانات الأكل اللى مليانه زيوت مهدرجه ومواد مسرطنه
.. ناخد فاصل
مين المسئول عن استيراد ودخول الحاجات دى البلد؟؟
ورجعنالكم تانى ونكمل ونقول ان كل ماالمستوى بيطلع لفوق
مستوى الكدب بيعلى أكتر
ناخد مثال من كدب الحكومات على شعوبها .؟؟
أى مسئول بيطلع بيتكلم عن منظومة العمل فى شفافيه
والمنظومات المتكامله للعمل الميدانى
كلام والله ماهتلاقيه فى معجم ولا فى كتاب سلاح التلميذ
وما أكثر وما أسهل الكلام عن احلام الطبقات الكادحه
والاستخفاف بيها
وازاى ان هيبقى فى كل منطقه عشوائيه مول تجارى كبير
وان هيبقى بين كل 4 أو 5 عشش
حمام سباحه ساقع فى الصيف وسخن فى الشتا
وسوف يتم توفير الطعميه النصف مجهزه
(( طعميه نص مقليه))
وتخفيض أسعار السوسيس والهمبورجر
ده غير افتتاح سلسلة بيتزا ابو دومه
بأسعار تنافس الجميع 50 قرش للقطعه
وطبعا الخطه القادمه سوف تتضمن بل
وقد تم ادراج قواعد ثابته
لخطه مستقبليه تتضمن القضاء على بطالة الشباب
فى مده لاتتجاوز ولن تتخطى 4 شهور و21 يوم تحديـــــدا
بعد خصم ايام الجمعه
والاجازات الرسمية .. وياجماعه مننساش الدعم اللانهائى
لرغيف العيش وان هيبقى فيه دقيق أخيرا
بدل الرمل والاسمنت البورتلاندى
وناخد فاصل تانى ..
هنفضل لغاية امتى .. نصدق الكدب بتاع الناس دى؟؟؟
ومره تانيه نرجع ومعانا على الهوى اهم فقره واخر فقره معانا
الكدب العربى
مساكم الله بالخير .. حياكم الله
احنا كعرب .. حدث ولاحرج .. اقوى اتحاد فيدرالى وكونفيدرالى
وديموقراطى وليبرالى واشتراكى ورأسمالى وحيزبونى
كل العالم بيخاف مننا .. امريكا بتعملنا الف حساب
دورنا كان واضح قدام العالم كله لما اسرائيل ضربت لبنان
وطبعا بعد اجتماعات الشجب والتنديد حقنا وصلنا
وطبعا اسرائيل انسحبت .. وكمان من الرعب اللى هى فيه
قررت الانسحاب الكامل وبدون اى شروط من فلسطين
وخدت مزرعتين ايجار جديد فى استراليا عشان الاسرائيليين يعيشوا
من فتره سمعنا عن الطفلة مريم اللى فقدت أطرافها الاربعه
بسبب تشخيص خاطئ
وطبعا والدها هد الدنيا ... وفى النهايه اتصرف ليه تعويض
عاوز أقول لابو مريم الحمدلله ان مريم لسه عايشه معاك رغم محنتك
فى لبنان 50 الف مريم ماتت تحت أنقاض القصف الاسرائيلى
فى العراق50 الف مريم ماتت بطلقات المرتزقه
فى مصر 50 الف مريم ماتت بسبب السرطان والكبد الوبائى
ياريت نسكت دقيقة حداد على روح كل مريم ماتت فى اى ارض عربيه
من غير مايتاخد حقها
ولسه معادنا ان شاء الله
مع زيوس وارتميس وهيرا
ويارب يلخص بسرعه
KaReeM
