زيوس الان يجلس مهموما على اريكته الدمياطية المعتبره .. ويزفر
فى ضجر خانق مناديا هيرا التى احرقت للتو صينية البطاطس
ويقول فى غضب هادر .. أين باقى أفراد الاسطورة ....؟؟؟؟؟
ترد هيرا فى لهجة تحمل اللامبالاه وهى تلوح بيديها باستنكار مستفز
(( لم يكن لفظ بتنفضله قد عرف عند الاغريق القدماء))
الصبر طيب ياحج زيوس زمان الولاد جايين
أطلس كلمته كان فى اسكندريه عند خاله بطليموس بيصيف
وقال انه جاى وحاجز على اول بساط سحرى
وأثينا كالعاده كان فى النيابة عشان خناقة الاسبوع اللى فات لما مسكوا
معاه الرمح سن الفيل
وفينوس هانم فى الكوافير وأرتميس بيصطاد قال انه عازمنا على طائر الرخ
ارتحت يازيوس ...؟؟؟
لكن زيوس مازل يفكر فى حزن .. وقال وهو ينفث دخان سيجارته
ولكن يا هيرا .... أين أبوللو ...؟؟؟؟
قالت وهى تغمغم .. يخرب بيت الزهايمر ياراجل
أبوللو براد بيت قطع راسه فى فيلم حصان طرواده
أومأ زيوس برأسه موحيا بالتذكر ..
وظل جالسا فى انتظار موعد الاجتماع الاسطورى
.............................
مستحيـــــــــــــل ..
قالتها فينوس أفروديت وهى تعدل خصلات شعرها المتدلى
وكذلك أطاح أطلس بكوب الكاكاو الدافئ من أمامه
وهو يردد بعض السباب
ويقول انا لايمكن اتنازل عن حقى بسهوله كده
بقى بعد ماكنت مشارك نص كهنة اليونان تاكسيات ومحلات فول طعميه
اجى اصحى الصبح ملاقيش حيلتى ابيض ولا أسود هأو يابابا زيوس
احنا مش اتفقنا اشوف نفسى فى البيزنس ونسيب السياسه لأرتميس .؟؟
كده مش حلو على فكرة
انا مش هرجع حاجه لحد ماتخلى باقية الناس ترجع الاول
انت والدوق هلتبيس قبل كده اخترعتوا نظام حاورينى ياكيكا
وبقى معاكو من كل ممتلكات كهنة اليونان النص
وانا مشاركهم فى النص التانى ..
جاى دلوقتى تقولى نرجع ... لالالالا
وهنا احتقن وجه زيوس .. يابنى الناس بدأت تبقى ضدنا
يابابا الناس لو ضدنا او بتكرهك كانت قالت لأ
قال زيوس .. هــــــــــــــــم ؟؟
ده كمان شئ غريب مش قادر أفهمه
ده شئ فى منتهى الخطورة معقول .؟؟
معقول لسه فى ناس بتسكت كده لغاية النهارده؟؟
وانا ياما قلت وحذرت محدش سمع كلامى
وفضلتوا متربسين دماغكو بشكل غريب
ياأطلس يابنى الضغط يولد الانفجار
أشاح أطلس بوجهه فى حنق .. بص اعمل اللى انت عاوزه
انا رايح نادى جبال أوليمب عندى ماتش كروكيه
ومتزعلش أرتميس والدوق آرثر وصلوا شوفوا انتو ناويين على ايه
وكالعاده انحنى الدوق آرثر عند دخوله للقصر نظرا لطوله الفارع
ثم جلس على أحد المقاعد وأطلق زفيرا طويلا
سأله زيوس عن السبب .. فقال
انا بقيت هزؤ أساسا وسط الناس خلينى استقيل ياعم
بلا دوق بلا زفت بقى
وهنا قهقه زيوس حتى اهتزت بطنه وقال :
المهم ياطويل التيله عملت ايه فى المجلس الملكى النهارده .؟؟
وارتسمت على وجه الدوق آرثر علامات البلاهة والتعجب
يا زيوس باشا احنا من 24 قرن بنعمل ايه .؟؟ مهو مفيش جديد
نروح الصبح ناخد قرارات ونغلى الرز والقمح وتعريفة الحناطير والحمير
احنا ورانا ايه .؟؟ ناقص نبيع الناس ونخلص ونسافر احنا والعائلة الكريمه
قال زيوس : طب عال عال عال عال عال
وقاطع هذا الحديث دخول الفاتنه هيرا ...
انا هعمل ايه السنه الجايه .. مفيش نيو لوك .؟؟
عاوزه اعمل حمله جديده ..اسميها .. الرشاقه للجميع
ويبقى شعارها وش نانسى ومدرعات هيفاء .. والباقى من اليسا وخلاص
قال زيوس .. عليا الطلاق انتى فاضيه أقولك ... احسن حاجه
تروحى تتفرجى على سعد الدالى
فقال الدوق آرثر فى تهكم واضح .. فكرونى بكره أقبض عليه
واتحفظ على ممتلكات اللى اسمه سعد ده ..شكله اقطاعى
انا سامع انه بيركب عربية بورش ب6 أحصنة أندلسى معتبرين
وده اهدار مال عام .. البلد محتاجه كل سحتوت دلوقتى
ابتسم ارتميس فى خبث واستطرد حديثه قائلا :
وليه تتحفظ عليه وتخلى الناس تعتبره بطل قومى .؟؟
احنا نرفع الشريحة الضريبية بتاعته وأكيد مش هيدفع
يبقى لمانتحفظ عليه هيبقى عندنا الحق لانه مبيدفعش حق الحكومه
قال آرثر : فكرة موووووز يامعلم دانت ولا هرقليز مدرب المنتخب
وابتسم زيوس وقال بلهجة تحمل بعض الرضا
عشان كده انا متأكد ان الاغريق هيبقوا بخير معاك
اصلى نويت استقيل كمان 200 سنة وعاوزك تبقى قد المسئولية
وفجأة دوت أصوات جماهير تشتعل غضبا وهى تتظاهر امام قصر زيوس
وتحمل لافتات تدعو لرفع الغلاء وتخفيض الضرائب وتصب غضبها
على حكومة آرثر وتطالب بإقالتها فورا
وتزيد الهتافات ويزيد معها القلق داخل قصر زيوس
فلم يعتادوا ان يثور الناس بهذا الشكل
وأخذ آرثر يولول كالنساء وهو يقول هيموتونى يامه
واسند زيوس ظهره فى يأس الى كرسيه وهو يسترجع
بعض ذكرياته بينما ينطق لسانه فى تأكيد لما سيحدث
انها النهاية
ومع تلك الكلمات بدأ يتخللها شعور دافئ يداعب وجهى فى شغب
و.... مهلا ... انه صوت الحاجه ينادينى لكى استيقظ وهى توبخنى
كالعاده بأن الساعه قد تجاوزت العاشرة صباحا
وانا مازلت فى فراشى .. لكن ياله من كابوس
قمت وغمرت وجهى بالماء وفتحت صفحة للانترنت لمتابعة
اخر اخبار عصام الحضرى فى سيون
K@ReeM
