مفيش فايدة
جملة قالها سعد زغلول من زمان بس يبدو كان عنده بعد نظر
لانه تقريبا مكنش يقصدها للسياسة بس
تخيل لما تبقى وزارة الزراعة تقريبا معاها ورد وشجر عهدة
مخصص انه يتفرش وقت مايكون فيه زيارات او وفود اجنبية جاية مصر
وبعد الزيارة يتشال تانى ويخش مخازن الوزارة .؟؟
واننا بنضف شوارع مصر بردو وندهن البيوت لنفس السبب
وكمان جددنا دهان قبة جامعة القاهرة ودهنا السور اخضر ملعلع
واللى متعملش لما كانت جامعة القاهرة بتحتفل بمئويتها واللى عدت
بدون مانحس بيها ولاحتى جبنا برشلونه تكسبنا 4/0 تانى
كله اتجهز علشان اوباما جاى .. وكأننا مش بننضف غير لما يبقى جاى ضيوف
وتحت مسمى تانى مستر خالد يوسف اللى مصور للست هيفا جوه جامع
وفيلمه اللى عامل دوشة كالعادة وكأن بردو مصر كلها عطشانة مسخرة
وتيجى مذيعة تسأل هيفا تقولها ممكن نشوفك بالحجاب زى حنان ترك !!
اكيد لما كانت بتقول عن حنان كانت تقصد الحجاب المحترم
لكن عن هيفا اكيد طبعا كانت تقصد الحجاب الحاجز
وتخيلوا ان احنا بقى عندنا قناه فضائية متخصصة للقطاع الفاضى
بيقودها مذيع جاى من كوكب فيجا .. خالد حمزاوى
اللى برع مع ممدوح فرج فى انه يطرم الطورمايات ويقطقط القطط
وتلاقى الناس بتغازله على الهوا عاااادى وطبيعى
مهو فعلا .. لو حياتك فاضية , املاها بالهيافة ,وهتكسب فلوس كتيرة مله
وتقريبا بعض الشباب بقى بيتكلم عن قرب شريط عمرو دياب كأنه منهج فى ثانوى
وهييجى منه امتحان بغض النظر عن ان الموضه ان الشريط بيتسرب كل مره
وبمناسبة الثانوية كل سنه واحنا طيبين واهالينا عندهم الضغط بسبب الامتحانات
وتسريبها ثم عمل خطه لمنع التسريب ثم هتتسرب بردو .. عادى احنا فى مصر وبنحب نخدم
ومنظر الام اللى بتبكى سواء الامتحان جه صعب او سهل
ماهى يااما بتدعى على الجهبذ اللى حاطه يااما من فرحتها بسهولته
وكل ده لان احنا معندناش ثقة فى النظام التعليمى ومعانا حق
شيلوا سنه سادسه ورجعوا سنه سادسه واعهمل فجوة واب يخلى ابنه يسقط عمدا
علشان يبقى فى سنة الفجوة ويمتحن على مادتين ويجيب 160% يخش طب
او هندسه او هندسة بترول ويتخرج بردو يركب تكتك ..
ومن المهازل بردو ان اشهر قناة دينية بقى الاعلانات عليها اطول من البرامج ذاتها
وحدث ولا حرج عن الحلل والطواجن والطقم الصينى ال22 قطعة اللى هتزينى بيه سفرتك
وان مينفعش تعملى بشامل غير فى الطقم ده ولا تشربى عرق سوس غير فى الماجات دى
ده غير البوتوجاز الذكى اللى بيطفى لما اللبن يفور ,
وده بيفكرنى بأشهر مشهد كوميدى فى تاريخ السينما المصرية
لما تلاقى اخ واخت قاعدين وبينهم نظرات مريبة وفجأة ...
اللبن يفور والقهوة تغلى والموج خبط فى الصخر , وبعدها تلاقيها بتعيط
وبتقوله ليه عملت كده يامحسن !! .. والمفروض اننا طبعا فهمنا اللى حصل
واخيرا جه المنتخب الوطنى وختمها صح يعنى وراح شال 3 فى الجزائر
واحنا نهلل واحنا الفراعنة اللى خلينا الافيال من غير زلاليم والاسود من غير ذيول
ومنتخب المشجعين بتاع ليبتون راح وراهم فى كل حته و أوجو ياحضرى بقى حصالة
وكالعادة نمنا متنكدين كعادة كل تصفيات وزى ماطلعنا السنغال وهنطلع زامبيا المره دى
ان شاء الله 2014 هنطلع مدغشقر و2018 هنطلع جزر القمر او التشاد او سيراليون
او ممكن الفيفا تدخلنا كاس العالم بصفتنا اكتر منتخب فشل انه يوصل كاس العالم اصلا
ويبقى كل 200 سنه نخش مره , ويبقى عصفور فى اليد خير من 3 فى الجزائر
بقعد اتأمل كده واقول احنا ليه بنعمل فى نفسنا كده !!
مكتوب علينا يتحرق دمنا فى كل حاجه من التليفزيون للحكومة حتى كمان الكوره .؟؟
ياعم سعد .. باين مفيش فايدة
K@ReeM
