تخيل انك شوفت الشمس طلعت 8400 مره !!
وانك شوفت القمر بدر 280 مره ,
اسف عن لغة الارقام لكن الطبيعة الحالية تفرض عليا كده
اصل البيه بقى محاسب
وارجع واقول ان سهل قوى تعيش الأرقام دى
لو كان عندك 23 سنه
--------------
يمكن اول مره افكر فيها كده ..,
وانا عندى 21 كنت بحتفل علشان هخلص تعليم
وانا عندى 16 كنت هموت م الفرحه لانى اخيرا هشيل بطاقة شخصية ..,
وانا عندى 10 وانت نازل كنت بحتفل باليوم اللى اخيرا
هشترى فيه مسدس مياه .. حبذا لو كان 2 خرطوشة
و كأن يوم 16/3 هو يوم مسدس المياه فى حياتى
بس يمكن انا افتكرت مناسبات مسدس المياه لهدف ما
اكيد اختى وهى بتقرى الكلام ده دلوقتى هتفتكر يوم
مسدس المياه الاحمر وال10 حبايات وماج المياه بالملح.
الواحد وهو صغير لما كان بيخاف مثلا اول حاجه بتخطر
فى باله انه يجرى على الناس الكبار
فتخيل اننا بقينا احنا الناس الكبار دلوقتى
وتخيل تطور رد فعل الناس حواليك
من كل سنه وانتى طيبة يابطه وبوستين
ل كل سنه وانت طيب وماشاء الله بقيت راجل
وكل سنه وانت طيب وانت فى دولة غير الدولة
ووراك غسيل وقاعد زى نانسى عجرم لان فى الغالب غسالة
شقة الشركة بتكون بايظة او فيها ماس او واخدة ارضى
وياترى كمان سنه هتبقى كل سنه وانت طيب ايه ظروفها !
من سنتين كنا بنفكر نحوش علشان نغير الموبايل
نطلع اسبوعين اسكندريه ,دلوقتى بنحوش علشان مقدم شقه
مع ان الفرق بين الفترتين ميكملش 730 يوم بس !!
شوف قيمة الرقم تلاشث ازاى وهو بيعبر عن ذكرى
مع ان ليه قيمته لو كان فى صورة مرتب مثلا
مع ان الرقم هو هو 730 باختلاف الاطار الزمنى بس
او ان الزيارة العائلية بعد ماكان مضمونها قوم ياحبيبى
العب جوه مع اخواتك !!ممن تبقى زيارة انت البطل فيها
ويتقالك ياحبيبى مش مهم الفلوس احنا بنشترى راجل
ولاخر اللى ممكن تسمعه على نفس النمط من فيلم الحفيد
صدفة خلتنى افكر اكتب كده .. محمد منير تحديدا
وهو بيقول امبارح كان عمرى عشرين
وهو فعلا كده امبارح كان عندى 20 سنه ومن اسبوع كده
كنت فى الاعدادية ايام التفكير المثالى ومجتمع يوتوبيا البحت
الله اعلم بكره هيبقى عندى كام سنه
والناس هتقولى كل سنه وانت طيب ازاى .؟؟!!
خيالى بياخدنى لصورة انى كبرت وابنى بيشدنى
انزل اشترى ليه بطيخه أو بيحكيلى
انه ضرب سبيدر مان فى الحضنة .. اطفال بقى
وبتشد لصورة ان شعرى بقى ابيض ومش عاوز اقول وقع
والحاجه قاعدة جنبى وبقولها فاكرة
لما نزلنا نشترى اول علبة بامبرز لابن الكلب
اللى هيتجوز بكره ده ؟؟
تضحك وتقولى بامبرز ايه دلوقتى ابنك بقى عريس !!
ارجع من خيالى الشاطح واقول يااااااه
ده انا لسه عندى 23 سنه ..
بس الحقيقة فعلا اننا بنكبر
K@ReeM
