مسـرح ... فقـرة الساحـــر
من غير مقدمات عن عرضنا ,,,,,,,,
أصل كل العرض جوه التاريخ
ملوش مصدر ..
يعنى ..ملوش تحريف ..
والفرق شعره مابين الصح والتزييف
لكن انتباه .. كل اللى فوق
قولناه مش بالضرورة تخاريف .
بنفسك هتخش جوه اللعب ..
وامشى لو مليت أو دب فيك التعب
وأوعى القلق يديك نتائج مؤذيه
فى النهاية كل العرض بغرض التسلية
شـــــــــــــــــــــــــــــــــــــــــــــــــش
( 1 )
صندوق الدنيا من كل لون اتملا
فيه اللى مبكتش عينه واللى بالحزن ابتلى
قد النقايض راح تلقى إيه فى دنيتك
مش بالشكل ده تبقى الحياه .. مهزلة !! ؟
دخل الأولانى فارد كتاف عنترة .. بثقل خطاوى مبين المنظرة
قال هجرب هخسر إيه .؟؟
قصاقيص ورق عماله تتحرك وكله لعب وخفة .. فن متفبرك
قعد الضيف بيتفرج سيبوه ..
لا تندهوه ولا تزعجوه
كل اللى شافه هيحكى عليه
و......... صرخ وقال كفاية
انتوا بتورونى إيه .؟؟ ولا
أنتوا عملتوا فيا إيه .؟؟
لو اللى شوفته حقيقى طب ايه
العمل .؟
ده اللى جوه مات .. لأ ..
ده اتقتل .!!
والأدهى إنه كان بيشبهنى ..
قتلت مين ولا مين هيقتلنى ..؟؟
.. الفرق شعره مابين الصح والتزييف ..
سؤال خفيف .. هو الدم لو
فاير دايما بيبقى نزيف .؟؟
أصل القتل فى الصندوق ملوش
تعريف
دور تلاقى الجواب عندك ...
هو انت جرحت مين ولا مين جرحك .؟؟
بسرعة غيروا الديكورات ..
معانا لعبة عن اللى فات
عن خطوة تبان من بعيد
مسافات ...
ولو قربت تلاقى كل اللى
شفته تهيؤات .. ..
( 2 )
من فوق نضاراتك بص شوف الملحمة
هتلاقى بحر كبير والكل فيه اترمى
فيه اللى طاله الموج وفيه اللى احتمى
وفيه اللى ماسك فى الهوى ... أصله اتعمى
قرب كمان قرب كمان قرب ...
لسه ليه واقف بعيد ومستغرب
برواز قزاز هتبص منه ...
لكنه ... لا بيفرق ولا يقرب
هتشوف اللى نفسك فيه ..
وحلمت يوم تلاقيه ..
أو خفت منه وبدأت تتهرب , مستني
إيه !!.. ماتيجى وتجرب ..؟؟
قام واحد من الجمهور وحط
النضارات فوق عينيه
مرت ثوانى ابتسم .. وكأن
الملايكة جاية عليه
سكت .. شال النضارات وقال
خلصت
صح .. مشيت كتير بس مكنتش أعرف
بمشى ليه
ومكنتش اعرف هوصل لفين
ولإيه ..
بس اللى شوفته كان الأمل
بيفكر فى الهرب
وشكله كان شايب عجوز .. هو
الأمل ممكن يكون اكتأب .؟؟
حيرتنى .. وبجد خوفتنى ,,,
ممكن ملاحظة صغيرة .. ؟؟
أصل الحياة والأمل وشين .. لو واحد منهم هرب التانى هيروح فين
لو دبل الأمل هيموت .. وإن مات .. هتعيش الحياة مع مين .؟؟
ديكور جديد .. معانا عرض لعبة المواعيد
( 3 )
واقفين وبكره فارد ضله من فوقهم
بينهم كلام الحب بيدارو فيه خوفهم
كانوا مع بعض .. بكل حاجه بيحلموا
كانوا مع بعض .. بس إيه
اللى فرقهم .؟؟
فيلم ... مشاهده كل يوم
بتتكرر
فى أوله بنحلم وفـ آخره
بنفكر .. وبنقرر
هتشوف مجرد فيلم .. أو حلم
حصل معاك او لأ .. أو خلص
قبل مايكون بدأ
وفر كل الأسئلة .. عمر
التسالى ما كانت مشكلة ...
بدأ العرض من ورى الستار يطلع
.. نسكت بقى ونسمع !!
-
هو انتى ليه لما يبقى الفرق مابينا
خطوة بتبعدى ؟هتمشى ولا بتعندى.؟
هو انتى ليه دايما كده .؟
بتقربيلى وخطوتك مترددة .؟
بتخوفينى انك تصدينى لو
قربتلك .. ولو وقفت مكانى مخوفانى انى أخسرك
ولو بعدت تقولى انك مش قادرة تنسينى , مع انك انتى اللى سبتينى
ولو بعدت تقولى انك مش قادرة تنسينى , مع انك انتى اللى سبتينى
بجد معرفش إن كنت مش فاهمك
ولا مش عارف افهمك ,,,
-
هو أنت ليه بتظلمنى .؟؟ هو انت يوم
قربت بجد منى .؟؟
أفهم منين احساسك وانت عنى
بتخبيه ؟؟ مع انى كتير حلمت انك تكون ليا,
بس هفضل لأمتى مستنيه .؟؟
-
حلمتى !!! أسهلك اكون عندك حكاية منسية
..
عاوزة تمشى متستنيش ....
وياريت كمان مترجعيش
-
أيوه همشى بس ياريت تسامحنى .. وبجد
تعرف انك هتوحشنى
-
عارفة ان كلامك بدأ يضحكنى !! .. ؟؟
-
هو انت ليه مش مصدقنى .؟؟
وليه مش مقتنع بأن بعادى
قبل مايجرحك كان بيقتلنى .؟؟
بس مهما شرحت ليك عارفاك ..
مش هتسمعنى
-
لا تسمعينى ولا اسمعك ... وايه الفائدة
لو طال الكلام .؟؟
لا هيخليكى تستني ولا انا
ممكن أصدقك , ولا هيخلينى أجرى وراكى أو أندهك ..
وكل اللى فات هقفل عليه من سكات ... عارفة ليه .؟؟
وكل اللى فات هقفل عليه من سكات ... عارفة ليه .؟؟
فى كل مرة كنتى بتبعدى كان
جزء من اللى فـ قلبى ليكى بيبقى مات ..
العرض ملوش تعليق .. وبلاش
الاعتراض وكتر الصفير والزعيق
الحدوته شكلها معقدة وتحير
, ومش هتتغير ..
والقصد مش مين فيهم اللى
بعد .. لكن قلب مين اللى جمد !!
عابر سبيل .. وطنه الطريق
والسفر .. وبيته فى قلب جنح الليل ..
رحال بسيط والناس بتصنفه من
معشر المخابيل ...
والنهارده ... جاى يبقى ضيفنا
دقائق .. تيجو نسمعه !!
( 4 )
قالوا بين اللقا والفراق قنطرة
وفنار بنوره يلم شمل النطورة
لكن الحكاية ليها سر بسيط
مهما مشيت .. خطوتك بترجع ورى
قرب وماسك فى إيده عكازه ..
عجوز وان كان ده سر اعجازه ..
بدأ كلامه ببطء .. وكأنه
خايف من كسر السكوت للنطق :
قبل ما يطول الكلام ويطل
السكوت بعديه مدارى عنيه وهو بيشاور .. سلام
قبل النهاية بثانيتين .. من
غير قلق هيفوتوا ما قبلهم فاتت سنين
وقبل ما ينزل التتر الحزين
بشوية حروف النقط فوقيها ملخبطة ..
.. زى مايكون اللى فات كان شوية شخبطة ..
ويفيد بإيه الدنيا لما تبقى
منورة ..
بعد أما تبقى تاريخ فى كام حكاية
منطورة ..
و أمسك دموعك ... سيبها زى
ما هى محجرة ..
من غير سؤال .. من غير
ياترى .. مفيش حياة رسمت خطوطها المسطرة .
زى ما يكون اللى فات أمل ضل
الطريق
ملوش مكان ومن حواليه الكون
عمال يضيق
مشوار بتاكله النار والفرحة
خايفة تكمله
والوقت كمان بيخنق فيه
وكأنه عاوز يقتله ...
زى ما يكون اللى فات دخان
فى مفترق الطرق
طريق ياخدك لقلب الخوف
والتانى ياخدك للقلق
واختار بسرعة قبل ما يفوتك
السبق
كمل وعدى وطير لو حتى جناحك
انكسر ... واتحرق
متاهة .. من يوم دخلناها
وإيدينا فيها مربطة .
وكل محاولات الهرب وأصوات التعب .. شوية شخبطة .
دق العجوز بعكازه .. يقصد
رحيله أصل السفر بقى حياته وملاذه .
الوقت قرب ينتهى .. وقبل الناس ماتبدأ تتلهى
.. معانا عرض أخير ..
( 5 )
على رقعة الشطرنج وقف برتبة عسكري
جايله الملك بيجر طوابى بتتهرى
أعزل جريح وصوته زى الفحيح
لكن الرعب بردو خلاه .. جرى
اللعبة دى عننا .. يعنى (
احنا ) أبطالها ..
لما ندور على الدنيا اللى
مش لينا وبردو نختارها ..
ونقعد فى انتظار حاجات خلصت
ونسأل إيه اللى أخرها ..
قال إيه وحشتنا أخبارها
وخايفين ليكون التراب غطاها أو طالها .
أو نحبس نفسنا فى نفسنا ..
وخايفين لحظة ما نهرب مننا
نقوم نلاقينا تانى فى وشنا ..
شكلى بتفلسف ...
وكلامى عن ( احنا ) كتر ..
تيجو نختصر .؟؟
إحنا صمت الكلام فوق ورق الكتب
..
وسؤال بيطلع كل ثانية بدون سبب
عن لحظة وداع سببها كان غباء الاندفاع
والحب اللى مات بين ايدين الحنين وكان بيبكى من الوجع
ينفع .؟؟ مهو مات خلاص .. يعنى نفع
لحظة الاشتياق بقت العدو .. ولا تطاق
ونقف ساعة الوداع خايفين ليجرفنا الفراق
ماشيين وسط الفراغ بنقول ياه على الخنقة
وننفخ نار من كتر الزحمة والزنقة ..
إحنا الغلط كل الغلط .. والعقل لو صابه الشطط
وعقد ماضي خيوطه دابت وانفرط
ننزل نلملم فيه وبكره فـ ضهرنا من كتر الجنان والعبط
إحنا اللى من كتر الجري قرب يموتنا التعب
ومش عارفين هو إحنا بنلعب بمين ولا إحنا اللى بينا بيتلعب
لــكـــــــــــــــــــــــــــــــــــــن
متسيبش القلق يديك نتائج مؤذية .. العرض كله بغرض التسلية
K@ReeM
