دبــابـــيــــس .. افتتاحيات

دبابيـــس .. سلسلة من الثرثرة تبدو وكأنها غير منتهية حتى لصاحبها الثرثار نفسه

فكلما توقفت , تبدأ من جديد .. وكلما قررت إغلاقها تمهيدا لمرحلة المعالجة والطبع

يعود ملف الوورد يفرض نفسه على سطح المكتب كمشروع غير مكتمل

أتمنى الوصول لمرحلة ترضينى لأتوقف على الأقل كجزء أول

=================================

مشكلة من لا يعرفون أنهم لا يتوقفون عن الثرثرة أبدا .



نحن نعشق التفكير والاقتناع بظرية المؤامرة , لأنها ببساطة تجعلنا نبدو

أكثر ذكاءا مما نحن عليه فعلا .


كلما استمعت لبعض اللذين يتحفوننا باسم الدين , شعرت برغبة ملحة للوقوف

دقيقة حداد على أرواح كفار قريش .



الشجاعة أن تواجه سلبياتك وسلبيات من حولك , لكنك تجد فى

حالة ** إعمل نفسك ميت ** متعة خاصة حينما تتدفق أمامك تفاهات الآخرين .



أتمنى أن أجد يوما تلك ( البلية ) التى كلما لعبت مع أحدهم تحول لرأسمالى محترم .



لقد اكتأبت ليس لأنها تبتعد, بل لأن المسافة بيننا اتسعت لدرجة لا تسمح لنا بالعودة .



أنا مرتبط .. كلمة تعنى أنه على وشك الدخول فى حالة الاكتئاب التى يتمناها .



ليس كل مالا تسطيع أن تفهمه هو شيء عبقرى , ربما كان تافها جدا لدرجة

تجعلك غير قادر على استيعابه



الفارق كبير بين الحنان والرياء , أن تضمى لصدرك طفلا بائسا

لمجرد أن تخففى عنه أو تشاركينه لحظة ما , أو لتلتقطك عدسات احدى المجلات

لتنهال عليك العبارات المملة , كم أنت رائعة , كم أنت انسانة , كم انت حنونة .



معظم الرجال لدية تلك الحالة من الذعر , أن تنظر فى المرآة لتجد قمة رأسك

أصبحت عارية تماما , ثم تتأمل تلك الصورة ببطء راغبا فى أنها ليست لك

أو أن هذا ليس انعكاسك .



هل يشدو جهاز الاستريو خاصتك بسيمفونيات الوادع .؟؟

تنظر لهاتفك المحمول كل 23 ثانية .؟؟ تداهمك بعض الآلام فى كتفك الأيسر .؟؟

بدت عليك علامات البلاهة والدروشة .؟؟

اذن فمرحبا بك فى عالم ( الانفصال العاطفى ) الرحب ..



كان يتفاخر بتحكمة فى ( الجماعة ) وأن الشورة شورته , وفى السجن

لم يصدق أحد أن ( الجماعة ) التى كان يتحدث عنها على القهوة

هى ( المدام ) .ء



عندما تقول لك بهدوء وحزن ( فلنبقى أصدقاء ) .. فاعلم أنها المرة الأخيرة

التى سترى فيها ( وش أمها ) .ء

=====================

All RightS Reserved

K@ReeM

=====================

بين الزمالك والثورة ونظرية بخ

للمرة الثانية خلال عشرة أيام يكون هذا اليوم هو اليوم الثالث على التوالى

الذى لم تذق فيه حواسى لذة النوم , وربما سيكون هذا سببا مقنعا

لكى تتغاضو عن ( تهييساتى ) المبعثرة فوق أسطر هذا المقال .

كانت أمامى محطة ما تذيع مايحدث فى التحرير ,

الكاميرات مثبته على شارع محمد محمود ويظهر لكل بصير كيف كانت زجاجات المولتوف

وتلك الشماريخ تعبر فوق رؤوس الجميع ناحية مجندى الأمن المركزى ,

وللعجب أننى كنت أرى ذلك المذيع الشاعر يحاول جاهدا فى كل اتصال

ومع كل ضيف أن يقتلع اعترافا ضمنيا يدين الشرطة أو يثبت عليها نظريات العنف

تجاه المتظاهرين , كالعادة لم احتمل نفاقه وغطرسته المعتادة ,

فقمت بتحويل القناة لأفاجأ بالسيد مرتضى منصور فى مؤتمر صحفى

يعلن تخليه عن كل القضايا ذات الخصومة مع نادى الزمالك ..

هنا جائتنى تلك الفكرة الشيطانية :

1- بلا قياده :

كم من الوقت قضاها نادى الزمالك بلاقيادة ؟ مجلس منتخب ثم تحدث الخلافات

فيرفع أحدهم قضية على الآخر فتثبت تهمة التزوير ليتم حل مجلس الإدارة

وتعيين آخر لمدة لحين اعادة الانتخاب .. الثورة ذاتها بدأت بلا قيادة ,

دعوة تظاهرة عادية فوجئ الجميع بمدى الإقبال فتحولت لثورة شعبية

حجزت مكانها فى التاريخ بحروف مضيئة , ولكن رحلة البحث عن القيادة

هى من نالت منها كثيرا , البرادعى الذى أتى يوم الغضب قادما من فيينا

ليمارس هواية القفز بالمظلات , أسماء محفوظ التى ظهرت كأول من دعت للتظاهرة

أو وائل غنيم الذى تم القبض عليه والإفراج عنه دون أن يمسه أحد

وتكريس بعض الإعلاميين وقتهم وأموال معلنيهم لهذا الترويج الفاضح ,

أحد شيوخ المهجر الذى أكد أنها ثورة إسلامية , كلهم تناسوا

أنها نجحت بالشعب غير المسيس أصلا , وهو مايدفعك للنظر لها بعين الشفقة

قبل عين الإهتمام .

2- صراع :

يظهر الغزال الخلوق ابراهيم يوسف مع كابتن شلبلب شلبوكا

وهو ممتقع الملامح يردد نبرة : مش هو ده نادى الزمالك ياكابتن مدحت ,

احنا نادى كبير ونادى بطولات ولازم ولاد النادى هما اللى يقودوا المرحلة دى ,

أشرف قاسم مع شوبير : يا كابتن نادى الزمالك بيمر بمحنة ,

لو ولاد النادى موقفوش جنبه مين هيساعدنا ؟ خالد الغندور مغلفا ببعض الحقد :

فى نفوس جوه الزمالك مش حلوة , لازم الناس تحط قدامها نادى الزمالك

بعيد عن أى مصالح شخصية وطبعا فاهمينى .. يصر أنه عبقرى يستطيع اقناعنا بإيحاءاته

ويقتنع أننا من الممكن أن نهتم بها ! .

فى الثورة لم نفاجأ بجديد , 50 ائتلاف لكل توجهاته وكل واحد منهم

ينكر على الآخر انه ائتلاف الثورة , الأسوانى مع يسرى فوده يحاول جعل الثورة

تتخذ مسارا معينا وكأنها رواية من أعماله , ابراهيم عيسى فى صالونه

أو تحريره يحدد لها مسارا آخر , يظهر البرادعى مع ريم ماجد ليحدد مسارا

ثالثا تماما , فيأتى الاستفتاء الدستورى ليكون بمثابة ( قفا ) يهبط على

مؤخرات اعناق الجميع ويحدد الشعب مساره بعيدا عن مجالس النخب ,

ثم احتدام الصراع الخفى والعلنى بين كل التيارات فى سباق محموم

على فرض كلمة أو توجه خاص بها لأمر وصل للتخوين والتكفير .

3- الزمالك قادم = الثورة مستمرة :

هنكسبكوا , حتى لو محظوظين هنكسبكوا , الزمالك قادم , الأبيض قادم ..

كلمات نسمعها منذ عقود , فلم يأتى الزمالك بعد

ولم يعلن اتحاد الكرة عن الزمالك بطلا للعام الثامن فى أى بطولة كانت

اللهم الا كأس يتيم .. ومازلنا فى انتظار الزمالك القادم ..

الثورة مستمرة : انا ركبت تاكسى النهارده والسواق قعد يدعيلنا وقالى لازم تكملوا ..

فى الاتوبيس كل الناس بتتكلم عن محاكمة مبارك وعاوزين محاكمات ثورية ..

المترو كله بيقف قدام محطة الشهداء وبيقرأ الفاتحة ..

كمية من الهراء والهراء المتبادل يتم افرازها لنا على اعتبار اننا

قوم من السذج مازلنا ننساق بالعاطفة.

4- ملائكة مجنحة :

الجميع يحيك المؤامرات للزمالك , الزمالك لا يخسر الا بالتحكيم ,

اتحاد الفراولة يصر على تزوير التاريخ للأهلى لأن الزمالك

هو نادى القرن الحقيقى , حتى السحرة الأفارقة الأشرار اتحدوا

لتسخير الجن الأهلاوى ووضع الأعمال السفلية فى جدران النادى ..

تماما مثل الثورة واعلامها , فشبابها لايخطئون أبدا , تظهر أسماء على

قناة الجزيرة لتطاول على القوات المسلحة فيعترض الجميع على استدعاءها للتحقيق

وتخرج علينا الألسنة المدافعة عن حرية التعبير , وكأن حرية التعبير من ضمن فروعها

انعدام التربية , يتم اتهام علاء فى قضية تحريض قد تودعه مكبلا بالأصفاد لأعوام

خلف القضبان فيضربون عن الطعام ويسخر الاعلام وقته لأظهاره ثورى لايحق لأحد الاقتراب منه ,

ثم يستجدى مشاعر المشاهدين بطفله الذى لم يولد بعد ,

يصر يسرى فوده على اعتبار ان المشاغبين هم بلطجية يندسون وسط الثوار ,

لو تابع تويتات أصدقائه من فريق الاعداد الحقيقى لبرنامجه

لوجد انهم هم البلطجية وهم من يحرضون وهم من يحاولون التصعيد ,

لكنه اتخذ على عاتقه ان يصبح مذيعا ( ملاكى ) يعبر عن رأى أصدقائه

بلا أدنى درجات المهنية .

5- نظرية بخ :

محمود معروف .. فى كل حصاد أسبوع يطل علينا الرجل

محملا بقدر لا بأس به من العقد والأحقاد على لاعبى الأهلى وجوزيه ,

الأمر الذى فاق حدوده ليجعل منه أضحوكة ومثار سخرية على الفايس بوك ويوتيوب ,

الجميع الآن ينتظر محمود معروف ليضحك وكأنه يشاهد وصلة كوميدية ما .

الثورة أيضا أصبحت ( بخ ) منذ شهر يناير وكل جمعة تحمل اسما يختلف ,

بدأت الثورة تفقد زخمها بسبب روادها , بدأ الجميع يتذمر , فيضيق ,

فانفجر ساخرا من كل شيء .. جمعة القصب , جمعة التحليل الجماعى , جمعة أوبح ,

أصبحت دعوة المليونية مثارا للسخرية , تجمع التحرير أصبح يعبر عن ضآلة

وفراغ صانعيه . وبدأ الجميع ينظر لكلمة الشعب يريد على طريقة

محمود عبدالعزيز فى الكيتكات : انت بتستعمانى يا هرم ؟

6- فشل :

يقول الزمالك سيتعاقد مع أحمد فتحى فيمضى للأهلى ,

عبدالله السعيد بالفانلة البيضاء فنفاجأ به فى مران الأهلى ,

الزمالك فى المئوية سيلاقى العملاق المدريدى ثم الميلان الايطالى ,

ثم شياطين مانشستر , وترسى السفينة على أتليتكو مدريد

ليهزم الزمالك 4-0 أيضا .

الثورة تريد أن تقيل شفيق , فيستقيل ويأتى شرف ( عضو لجنة السياسات ) محمولا

على الأعناق ليعلو الهتاف برحيله , أبو اسماعيل يعلن الاعتصام

ولا نراه فى الميدان , يجتمع مجلس ركاب الثورة ليعلن عن حكومة

فى حضور ( 17 نفر + مكبر صوت ) فى تحد للدولة

ولو تم الاعلان رسميا عن حكومة التهريج تلك لتعرضوا للاعتقال

بتهمة قلب نظام الحكم !! , كل ذلك يتم والانتخابات بعد أقل من 48 ساعة

والبشر يحاول أن يتخذ قرار التصويت دون اكتراث لما يقوله التلفاز

عن ذلك الهراء ..

النماذج تتكرر والنتيجة تؤدى لشيء واحد ..

زخم اعلامى يتضخم ثم يخبو ثم يتلاشى نهائيا .

العار على من يقنعون انفسهم ويريدون اقناعنا قسرا انهم ملاك الحدث ,

فبغطرستهم ينصرف عنهم الناس ويختزل فيهم الحدث ليصبح شيئا منبوذا ,

الثورة تشبه نادى الزمالك كثيرا , فكلاهما عظيم

لكن الزمالك بدأ يعتمد على تاريخه فلم يعد قادرا على مواصلة تدعيم

هذا التاريخ لدرجة أنه فشل فى تسويق أطقمه ,

وكذلك الثورة اختارات اسوأ من فيها ليصبحوا رموزها الاعلاميين

وبدأوا يمارسون على البسطاء دور ( المستبد المستنير ) فتارة قالوا

على الشعب انه مجرد كنبة يستحق مانريده له فقط

وتارة يستدرجونه للوقوف فى وجه الجيش , وتارة يتاجرون بمشاعره

حتى وان كان بالتدليس كما فعلت شبكة رصد فى صورة من غزة نشرتها

على أنها فى القاهرة , وكذلك 6 ابريل التى وضعت صورة لقنبلة اسرائيلية

من محرك جوجول على أحداث التحرير ,حتى بدأ ينفض عنهم الناس وعن الثورة ..

===================

All Rights Reserved

K@ReeM

===================

مسرح .. الضاحك الباكى

( 1 )

ياطفلة انا كنت زمان فى عمر الزهور زيك ,

كنت فى مثل سنك ,

بس الأيام بسرعة بتجرى من بين إيديا ,

وبردو فى يوم هتبصى تلاقيها جريت قوام منك

وهتبقى زيى تاريخ فى كام حكاية بيتحكى ..

وهتقعدى وهتفكرى فإيه اللى فات منك ..

يمكن أيامى مش هى نفس ايامك , ولا حتى احلامى هتتشابه باحلامك ,,

لكن الاهم من ده وده .. بلاش اكون انا الصورة اللى تحطيها قدامك .

صحيح بينا الشبه موجود علشان كده اخترتك ,

لكن والنبى خليكى محتفظة بإرادتك ..

واسمعى حكايتى قبل ما اسلمك رايتى .

ليه ؟؟ يابنتى انا بقيت مجرد ( كان ) .. مجرد حاجه

وانتهت من زمان ,

افهمى إنى التاريخ ذاته . بكل مراحلة و أوقاته ومسافاته وحتى ضلالاته ,

عشت قبل اختراع القتل بالصواريخ وعاصرت هواجس الابطال

مابين زئير النصر وبكا وانكسار وصريخ .

لكن عارفه ؟ مفيش مابين كل الورق شيء مختلف مهما يدور الزمن ويلف ..

وكل شيئ قابل إنه يتزيف

من غير ما تتصدمى فى لمعة الحكمة اللى فى عيونى ..

أصل بصراحة الناس هما اللى كتبونى

وافهمى انى مجرد سجل انكتب جواه أحداث جلل ,

وكل صاحب نفوذ مابين ورقى فى نفسه بيجمل ..

اكبر منافق فى التاريخ هو انا التاريخ نفسه ,

تحبى تسمعى لو التاريخ اتكلم هيعبر ازاى عن نفسه ؟

( 2 )

شايفه ابتسامتى ازاى جميلة بالمساحيق ؟ وكمان دموعى ..

كأنى ببكى بحق وحقيق

تعالى وقربى هتلاقى ملامحى بين الفرح والهم مستخبية ..

نظرة ألم مرسومة ورى ابتسامة شقية ..

واحترت مين أنا فى وسطهم وايه فيهم هى اللى حقيقية !!

ملامحى خط فيها البشر على كل لون وهوى .

وفيا اللى غرق فى حب نفسه وهوى ,

وفيا اللى طار لجل مايطول بايديه منابت فروع النسيم والهوا ,

وفيا اللى طاب من بؤس الحياة واستوى ,

وفيا اللى عاش لجل مايسمع كلمة من واحدة ما : موافقة نكون سوى ...

( 3 )

افهمى انى بس مهرج عجوز وبتشكل حسب المزاج ما يعوز .. طيب عاوزة تصدقى ؟

فى كتاب تاريخ ثانوى عاش راجل ابيضانى وكشر ,

اتعرف عنه الغضب ومزاج الدم ولسانه الزفر ,

كان ليه شنب قد عقلة صباع ملزوقه فوق شفة آرية ,

كان يقف تتهزله مقامات وتتفردله الايدين بتحية .

كان عنده جيش جرار وبارون شيطان طيار .. لكن الغرور هزمه ..

وانتحر قبل ماتطول رقبته المشنقة , وبعد ما مات لزقوله فيا تهمة المحرقة ,

عاش ومات مفترى لكنه لم يحرق من صنف الصهاينة كلب ,

لكن جوايا شال الذنب . !!

صدقتى ولا ازيدك من تزييفى حدوته ؟ ومعنتش هجيبلك سيرة الخواجات

علشان تكونى مبسوطه , وهجيبلك من دولاب الحياة حواديت مش من زمن ,

يمكن تفهمى انى تاريخ لا تثقى فيه ولا يؤتمن

طب تسمعى عن شاب مصرى جدع ؟ بعد انكساره بكى لكنه قفل جواه عـ الوجع ,

لا همه نار الشمس الكاوية فوق بشرته ولا عقارب برد لدغت فى عضمه ونخرته ,

كان كل همه يسمع بودنه الأمر , عاوز يعدى حتى لو كانت اخر دقايق العمر ..

ولما جاله الأمر عدى وعبر , وشاف بعينه مخاض الأمل وعرف انه انتصر ,

ومن فوق السارى مد ايده جاب علم العدو ومزعه ,

وبإيده حط العلم اللى حلم كتير يرفعه . بالذمة تعرفى اسم البطل ؟

عرفتى انى مش حقانى ولا الحقيقة هى اللى اتقالت على لسانى ؟

طب تسمعى عن مصرى تانى أصيل ؟ كان عبقرى ومختلف , كان محترف ..

كان يكتب يطاوعه الخيال ويميل لقلمه , وكام من عقل شاف بين سطوره حياته او حلمه ..

لكن انطفت شمعته لما وقف نبضه , وقف حواليه الجميع للحظة واتخضوا .

الموت مهما كان هيبة حتى لو كان سلاحه مصيبة .. وكان سلاحه طلقة جهل مش أكتر .

وبردو فـ سجلاتى طبيعى الكلام يكتر . ناس قالت ده مهادن ويستاهل .

قالت ده كان فكرة فى زمن فيه كانت الأفكار ولا أخطر ,

( 4 )

صدقتى ان اللى بيكتبونى بشر ؟ منهم أنانى وملاوع ومنهم منبت فى قلب عقله الشر ؟

ااااه .. نسيت اقولك اهم طوائف عالم الكتبانجية .. المصالحجية .

ناس فى النفاق ابداع ملهمش فى كتب الخداع كتالوج ..

وضمير بلاستيك طرى مع كل هوى بيموج ,

ضمير مطاط ...

شحات غتت و لكل باب محووج

طب ايه رأيك فى كل اللى من جيلك ؟ اللى بهرونى و باهرينك ؟

تفتكرى لو خالفتيهم بالذمة هيبقوا طايقينك ؟

إيه رأيك نتكلم فى الكلام السهل ؟ من غير تطويل ومقدمات او ملل ؟

( 5 )

هحكيلك حكاية وطن مليان وشوش مكنش للحزن فيها مثيل ,

عندهم بكره كان شيء فشوش , غبى وسئيل , كان الجميع فى ساقية ذل

واحلامهم تدور فى الفراغ طواحين , كان فيهم اللى اتنسوا واللى اتنفوا

وفيهم الجعانين , وفـ لحظة اتجمعوا وسط كل الدوامات ,

قالوا ( لأ ) شقوا بيها كل سكات , ولما قالوا معدش هيبقى للخوف صوت ,

خرجت فى وسطهم كاشف ضلوعى لحصادات الموت ,

وكانوا كام يوم ملهمش وسط كتب التاريخ امثلة ..

وفجأة اكتشفت ان هى هى المشكلة , هو أنا معاهم بثور على مين ؟

ما الكل فى الظلم متشابهين , وهتدورى تلاقى الجميع همهم واحد ,

والهدف كرسى مهما اتسع مايشيلش بردو غير واحد ,

وخناق اكم وزعيق وولا واحد بيسمع لـ ولا واحد .

كام شاب مات وكان هتافه للتغيير ؟

دلوقتى الهتاف والناس مابين رحاية الثورة والتكفير .

الحال اللى كان مايل صار للأسف أنيل , وفجر الحلم صار للغروب أميل ,

والناس 5 أنواع : ليبرالى وثورجى وكنبه وعيل فلول وأهبل ,

ولا انتى من نوع البشر الغيور ؟ توب ودقن وعود سواك وبخور ؟

اللى فى نظرهم كل اللى غيرهم مغيب قوى ومعذور ؟

ولا انتى نوعك الغالى ؟ التافه قوى والاسم ليبرالى ؟

انتى مين وسطهم ؟ ولا انتى مش زيهم ؟ ولا دول كلهم فى الاصل ناس غيرنا ؟؟

كل اللى قالوا الفهامين احنا وكل الفريق اللى همه تكفيرنا !!

ثورتك وثورة كل اللى زيك فين ؟اختفت ولا انتهت و لا تاهت ؟

ولا هى كمان يوم الغضب ماتت ؟

( 6 )

مش كل ده هم من كتر ماتبكى منه هتضحكى ؟

يا بنتى أصل انتى لسه عضمك طرى ,

فينك انتى وفين سجلات الشرف اللى التلاته منها بقرش ؟

حقايق زيف وبطولة كلها غش ؟ واللى يغيظ مقولة التاريخ هو الحكم .. ا

نا عمرى ماكنت حكم ده انا زيى زى اى موظف خسيس برتشى .. وبتعكم .

وهو ده حالى , وياريت تصدقى ان عمرى ماكنت شيء أيقونى ومثالى ,

يابنتى نظرة دهشتك بصيتها للى كان قبلى ومصدقتوش

لأنى كنت لسه فى سنك وتاريخ البشر كان لسه غامض ومعرفتوش ,

مسيرك هتتعودى وهتبطلى تستعجبى ,

بس دلوقتى جه وقتك لجل انا ما ارتاح

وافضى حمولى ليكى ويبقى وسع ضهرى براح ..

وافتكرى متذكريش عنى فى الكتب ولاشيء , احنا بس الحمالين وملناش دور

ومتشليش الهم بكره ييجيى بعدك واحد وياخد دور ..

وافتكرى ان بينى وبينك فى شبه موجود علشان كده اخترتك ,

لكن والنبى خليكى محتفظة بإرادتك ..

يمكن تقدرى تغيرى .. أو يمكن زيى تتغيرى .

============================

All Rights Reserved .. K@ReeM

============================