مساء الأنوار .. فى رمضان .

يتشارك الإعلام السياسى مع نظيره الرياضى فى أرضية عملاقة من الهراء والهراء المتبادل , هناك دائما عددا لا بأس به من الفلاسفة قادرون على تحليل لماذا يربط عماد متعب رباط حذائة بطريقة رأس الجزرة ولماذا  أبو تريكه دائما مميز فى الضربات الحرة رغم أنه لا يسجل منها سوى كل بضعة سنوات , هذا الشبه كفيل بتقديم جميعهم فى برامج اخرى على سبيل التبادل , خبراتهم أسطورية تؤهلهم للعمل فى المجال النووى وليس التحليل السياسى او الرياضى فقط

سأنقل لكم ملخصا لطريقة الاعلام  الرياضى فى مصر من وجهة نظرى , لأننى أريد أن يكون لهم برنامج رمضانى بنفس خبراتهم وتواجدهم ولكن فى السياسة على سبيل الترفيه وبرامج الكاميرا الخفية .

فى استوديو النيل يصر الكابتن ( فاروق جعفر ) أن هناك لاعب عشوائى يناسب الفرق العشوائية , كذلك فهو يصر أن هناك فرق بين الحظ والتوفيق , وأن عقدة شمال إفريقيا هى سبب تعثر الفرق فى البطولات والفرق المغمورة تمثل عبئا فنيا على المنتخب , ناهيك أن الريد سبيريت أو روح الفانلة الحمراء قادت الأهلى لتحقيق اللقب , وأن الزمالك ينقصه الهدوء الإدارى لتحقيق البطولات , أما الكابتن ( شالبوكا ) فيصر أنه
يتفق مع ( ايمن يونس ) تماما ,  ثم أنه لا يختلف اطلاقا مع ( مجدى عبدالغنى ) , ثم يطل
( خالد توحيد ) عندما كان يعمل فى قناة الاهلى لنرى معه أن الأهلى يعيش حالة من المثل والأخلاق يحسدها عليه الجميع فلا وجود لأى أخطاء او عثرات او سلبيات يجب ان يتم اصلاحها , أما ( شبانة ) فهو مازال ينوى كشف فساد اتحاد الكرة المصرى منذ أن كان سمير زاهر هو رئيسه أيضا فى عصر الأسرة الخامسة ,
أما ( بندق ) تراه جالسا يترقب بحذر سقطة أى حكم ليقوم بدوره التقليدى فى عمل دراسة مقارنة بين نفس الحالة وحالة مشابهة فى مبارة أخرى للنادى الأهلى منذ 10 سنوات ,أما التعليق فهى حالة مرعبة ,
كابتن ( شلبى ) عندما يقول ( والحطة والنطة والأطة والبطة ) وكابتن ( بكر ) الذى دائما مايتحفنا وكأن المشاهد يدير التلفاز ليذهب لشرب السجائر فى الشرفة ثم يعود بناءا على نصيحته ليشاهد الهدف فى الاعادة , كما أنه يصر على كلمة ( شيكل المباراة ) والـ هاهاهاها بعد كل مناورة أو تسديدة وهذا العبقرى الذى يضيف كلمة ( انمااااااااا ) بعد كل فرصة ضائعة , إنه عالم ثرى جدا يمكن تقديمه على أنه نخبة سياسية جديدة فى الوسط الاعلامى خاصة وهم بالطبيعة لا يختلفون عن نشطاء الانترنت او نجوم الفضائيات الاخرى .. لذا فسأقوم باختيار شخصيات بعينها اعتبرها انت اسقاط على شخصيات اخرى بعينها ..

دعونى أبدأ تصورى عن الحلقة الأولى 

اعلان بيبسى طويل , ثم اعلان بيبسى قصير .. اعلان نكتشف معه ليه هالة غيرت ثم اعلان شيبسى ردئ , ثم موسيقى رديئة جدا يظهر بعدها كابتن مدحت شلبى بربطة عنقه الفوشيا وهو يقول :

 اعزائى مشاهدين قناة مودرن سبورت مساء الانوار واهلا بيكم فى حلقة جديدة من .. مساء الانوار بردو خلونى أبدأ وارحب بضيوفى كابتن محمود معروف اهلا بيك , فينظر محمود للكاميرا بامتعاض وقرف .. كابتن أيمن يونس اهلا بيك .. يضحك لنا ضحكة صفراء , كابتن فاروق جعفر مساء الانوار , اهلا بيك يامرحت

مدحت : خلونى أبدأ الحوار بسؤال لكابتن معروف .. انت ايه رأيك فى المشهد السياسى ؟

معروف : بص يامدحت انت عارف انى صريح وجرئ وصحفى بكتب فى الجمهورية تلكسات محدش بيقراها غير ولاد اختى , اللى بيحصل ده كله من تحت راس الفلول وامن الدولة والمخابرات .. احنا قومنا بثورة مش لعبة ولازم مطالبها تتنفذ .. از !! متقوليش از .. احنا مكملين للآخر وعاوز أقول لمحمد نصر انت فلول واهلاوى ولو عندك الشجاعة هات صورة ميدان التحرير بدل ما انت جايب المنصة بس , وعاوزك تقولى يا نصر جوزيه بعد ماجاب عبدالله السعيد عمل بيه ايه ؟ مينفعش كده يامدحت .

مدحت : ها ها ها  كابتن معروف بيهزر يانصر خلونى اخد راى كابتنا الكبير وفيلسوف الكرة المصرية ايمن يونس فى الاعلان الدستورى المكمل .. ايه رايك ياكابتن ايمن ؟

ايمن : احنا فى فراغ يامدحت .. عاملين زى اللى بيدور على ركن فى اوضه مدورة , المنطق التحليلى الاساسى فى كل خطوة بتتاخد بعيد عن شكل اقناع المواطن بضرورة وقوفة جنب الاختيار المناسب , ابداع ارتجالية المواقف عند السياسيين وقت اللزوم شبه منعدم , مفيش سرعة اتخاذ قرار , وطالما مفيش سرعة اتخاذ قرار يبقى مفيش ابتكار وطالما مفيش ابتكار يبقى فى ازمه وطالما فى ازمه يبقى لازم يكون فى موقف وطالما فى موقف يبقى لازم يكون فيه تفكير وطالما فى تفكير يبقى لازم فى قرار , ومع ذلك مفيش قرارات يا كابتن مدحت ..

مدحت : طبعا وجهة نظرك ( اللى محدش فهم منها اى حاجه ) تحترم  واحنا بنأكد ان طول ما النقاش موضووووعى وبناااااء وهاااااااادف ده بيكون ليه أثر ايجابى جدا , خلونى استأذن كباتنا الكبار اقرى شوية رسايل قبل مانطلع فاصل اعلانى , بعد اذنكوا ياكباتن ..

رساله من أشرف أبو مهيطل : احنا بنحبك يا كابتن شلبلب قوى , انت وطنى جدا وبتحب مصر ..
آآآ شكرك يا احمد.

وفى رساله من يسارى وأفتخر بيقول يا شلبنتوف تعرف ايه الشبه بين واحده اسمها نوارة وبي قرد الاورانج اوتان ؟؟ الاتنين ..... حمرا , طبعا ده كلام صديقنا يسارى مش كلامنا وطالما مقدمش دليل على كلامه احنا مش هنقدر نعرضه لان احنا عندنا مصداقية ولينا ملايين المشاهدين اللى بيتابعونا صح يا كابتن معروف ؟

اللى بعدها واحد صديق البرنامج من منفلوط بيقول ياكابتن قول لمعروف ملوش دعوة بجوزية علشان منفسيلوش عجل عربيتهواحب اهديله اغنية خدوا سته رايح وخدوا اربعة جاى .

واحد باعتلنا نكته ومحلفنى أقراها بيقولى تعرف يا شلبوكا أكوا بارك ؟؟ أنا بقى اكوا منه .

اخر رساله علشان الوقت من حازم ابو اسماعيل بيقول احنا بنحبك قوى يا كابتن ممدوح ونفسنا تجيب لينا مطش من المطوشة الحريمى الدلع دى او تجيبلنا حلقة الاندرتيكه والحانوتى فى القفص .

فاروق جعفر : اسمحلى يا كابتن مدحت ارد على الرساله دى لأنها بتأكد نظريتى عن العشوائية , الراجل قاعد طول النهار قدام التلفزيون مهوش عارف هو بيتفرج على ايه ولا بيبعت لايه واللى مسكه موبايل ظلمه , مش فاهم انا ازاى مواطن قاعد بيتفرج على برنامج تحليل سياسى على قناة رياضية ويبعت رسالة لبرنامج مصارعه بيتذاع على قناة موجه كوميدى ؟ ايه اللى احنا فيه ده يا مرحت ؟ وانت طبعا عارف انا عا ـــ

مدحت : كلامك مظبوط يا كابتن روقه بس انا مضطر اقاطعك علشان صديق البرنامج الاستاذ وليد دعبس عاوز يقول كلمتين فى مداخلة .. اتفضل يا كابتن وليد مساء الانواااااااار

وليد : مساء الانوار يا كابتن وسلامى لكل كباتن مصر اللى مشرفينك وانا بس عاوز أقول حاجه مهمه قوى  , انت عارف الـ .. فا , واخدلى بالك انه .. فالطريقة دى انا مش مقــ ,,, طب هقولك على حاجه كمان , انت ازاى تعرف ان النضارة الريبان اصلية ولا مضروب ؟ بص على العدسة الشمال هتلاقى حرفين ار بى مكتوبين صغيرين قوى لو لاقيتهم تبقى اصليه ولو ملاقيتهمش تبقى اتخدعت يامدحت , معدش فى امان خلاص .. تصور انا اشتريت امبارح نضارة كاريرا علشان خوفت بردو انى لو جبت الريبان اللى عليها الحرفين تطلع مضروبه بردو .. البلد رايحه على فين يا كابتن مدحت ؟

مدحت : طبعا تخوفاتك فى محلها انا شخصيا عنت بخاف اشترى الاندومى لانى بخاف يطلع شعرية .

وبكده اعزائى المشاهدين نكون وصلنا لختام حلقتنا من مساء الانوار النهارده وبكره ان شاء الله فى حلقة جديدة فى نفس المعاد من مسااااااء  الانوار .. احنا طبعا كان معانا ضيف رابع هو الكابتن ابراهيم يوسف بس من اول الحلقة وهو نايم فمحبيناش نزعجه .. انتظرونا غدا فى حلقة جديدة من مساء الانوار .

K@ReeM

All Rights reserved