بره وجوه فرشت لك .. وانت مايل وايه يعدلك

كلنا عارفين اعلان شريف منير .. بتاع جهينه الرايب

وايه علاقة الفريسكا بالبحر والبصل الاخضر بشوربة الخضار

والفوار بعد الاكل وسفط اللبن بالزبادى.. وهلم جرجر

انا عاوز اعمل زى شريف بصراحه واسأل اسئلة زى دى

بس نحاول نجاوبها سوى ... اتفقنا .؟؟


اول سؤال ايه علاقة الاقتصاد المصرى ببرج بيزا المائل .؟؟

هو ده معووج وده معووج برضه .. بس الفرق جوهرى بصراحة

برج بيزا اعوجاجه اعجاز معمارى ..

لكن الاقتصاد المصرى .. هيــهات

هو مولود بعيب خلقى انه يمشى يعرج كده

وتتوالى الحكومات .. لأ الحكومات مش بتتوالى ..آسف

تتوالى الوزارات وتتوالى الهيئات والاصلاحات ودكاترة الجراحه

مفيش تقدم .. وساعة الحساب لازم يكون في كبش فداء

وبعد العزل المنصبى .. يجلس وحيدا شريدا مهموما

ويتمنى لو كان مرحوما

وهو يقول فى حزن غامر .. وحقد خانق

(( كل حلفائك خانوك ياريتشارد ))

ويمضى الزمن تباعا عادى جدا .. ولسه مايل برضه

فى اعجاز تاريخى يحسب للقائمين عليه بجد


او مثلا ايه علاقة الجنيه المصرى بالمايوه .؟؟

فى صباح يوم مشمس افاق الجنيه المصرى من سباته ..وقرر ان ينتعش

فأخذ الشمسيه وسندوتشات اللانشون ولتر بيبسى ماكس

عشان الدايت اللى عامله

وراح يقضى يوم على البحر فى الهوا كده ..

وقامت الغزاله سارحه معاه وخلع التى شيرت التوكيل

وهوب نزل البحر

وفجأه عاصفة هبت قوية جدا .. والجنيه قعد ينادى

ويطبش فى الميه عشان حد ينقذه

وفى الصباح التالى وجدو الجنيه مسطح على الرمل

واللى انقذه انه كان لابس بوكسر بلاستيك

فلما الميه دخلت فيه عمل زى العوامه

ومن هنا جاء اصطلاح تعويم الجنيه المصرى

وفى ناس بتقول ان دى نظريه اقتصاديه معروفه وكده يعنى

.. لكن كل ده كلام فارغ ياجماعه .. صدقونى


ونيجى نشوف مع بعض علاقة البطاله بالتضخم .. وهى بسيطه قوى

وهى ان البطالة كل سنه بتتضخم وبتنمو وبتنتشر وبتتوغل

وتدوم وتدوم وتدوم

حتى احنا ساعات نزود معدلات التضخم

عشان نحافظ على نسبة البطالة او نعكس

نزود البطاله ... اسف .. هى بتزيد لوحدها

عشان نحافظ على التضخم

يعنى مثلا عندنا كل سنه مايقرب من مليون خريج ..

وده العدد اللى على الورق

ونتيجه لده كل شاب يعانى بطاله بقى عنده تضخم جواه

اللى عنده تضخم فى المخ واللى فى المعده

واللى فى الزايده والمراره والمثانه

واللى مات مقهور واللى انتحر

واللى اتهبل ومشى فى الشوارع يقول

انا حسحس وحسحس انا

لكن بعض رجال الاعمال بارك الله فيهم وفى امثالهم

قرروا يقضوا على المعاناه

فقام البعض مشكورا بافتتاح سلاسل كوفى شوب على أعلى مستوى

عشان الشباب يتسلى .. وهو ماأدى بالفعل لتجميع الطاقة الشابه

فى سوق الميه السخنه

وترتب عليه ازدهار مصانع الضمنه فى الصين برضه

ولسه الاسئلة شغاله .. ايه علاقة محدود الدخل بالتنويم المغناطيسى .؟؟

مع تعديل بسيط فى أبجدية السؤال تظهر علاقه حميمه مستقبليه

بين محدودى الدخل .. والتموين المغناطيسى

وتسهيلا على المواطنين تقرر الغاء بطاقات التموين

ومنحهم بطاقات ممغنطه

يروح اى كشك يحط الكريدت كارت ويصرف حسب الحاجه .. براحته بقى

عاوز عدس ماشى .. فول ماشى .. آسف ..

الفول السلعة الوحيده المتوفره او رز , أو زيت ..

مع العلم ان الكريدت محدد بكذا أردب قمح .. خلصت أردباتك

وللعلم برضه الحساب بالسنبلة .. يعنى اطمن على رصيدك

تروح المجلس المحلى وتشترى كريدت كارت جديد .. بدون مصاريف اداريه

وانت براحتك واختار اللى يناسبك مع باقة الأسعار المعروضه

وبكده بقى فى فكر جديد

يقضى على طوابير منافذ التموين (( فى الحلم )) اكيد يعنى

وآخر سؤال معانا النهارده ..ايه علاقة الجهاز الهضمى بليمان طره .؟؟

يبتدى الجهاز الهضمى زى مادرسنا فى رابعه ابتدائى باللسان

واللسان ده أساس كل مصيبة ..

يعنى هو المسئول عن الهلفطه اللى شغاله من الصبح دى

وممكن فى أى لحظه يكون اللسان سبب قوى ومباشر

فى انك تستجم فى منتجع طره

وطبعا قبلها هتكون قعدت قعدة أخ مع أخوه .. صديق مع صديقه

مواطن شريف مع مواطن شريف زيه ..

ويبصلك بابتسامه ساحره وشامته

ويقولك (( وهكذا سقطت لويز )) وينده على

عبدالجبار اللى عارف شغله كويس

واللى اكيد هتحس بيه فى كل شبر فى جسمك بعد كل جلسة مساج

وفى النهايه ولو وصلت للسطر ده يبقى اكيد عرفت

ايه العلاقة بينى وبين الصبر اكيد ..

لانك انت اللى عملت الربط ده

انك تستحمل الموضوع لغاية نهايته ..

بشكرك جدا لو كنت وصلت لهنا فعلا

KaReeM