سينما 25 يناير ..Solo Comedy

الموضوع قديم نوعا ما , لكن اعادة نشره بناءا على رغبة البعض , وامعانا فى الكوميديا

===============

فيلم امريكى :

الشرطة تنسحب من الميدان والثوار يتهيألهم انهم نجحوا , يقومو باعتين ليهم مدرعات تقتحم الميدان وتاخد 200 الف اسير , يطلع واحد من الميدان يقول كلمتين فى الصميم وياخد 5 رجالة مسلحين بشوية اسلحة ليزر على خفيف ويطلعوا على وزارة الداخلية , يفك شفرة الباب الرئيسى بالفكاكة ويبطل مفعول

قنبلة فى السكة بالحظ واللى معاه طبعا بيرمو الحرس المقنع من الشبابيك

لغاية مايوصل للأوضة اللى فيها الـ 200 الف يحررهم ويخرج من المبنى

وهو مكتف وزير الداخلية ببلاستيك التغليف , ويحتفل مع رفاقه فى الميدان

وفجأة يكتشف انه كان بيحب واحدة من المخطوفين ويقوم لاطعها بوسه بريئة

الرقابة هتقصها طبعا .

فيلم مكسيكى :

الشرطة تنسحب من الميدان والثوار يتهيألهم انهم نجحوا ,

يقومو باعتين ليهم مدرعات مستخبية فى علب جيتار سودا تقتل 200 الف واحد ,

يقوم طالع واحد حاطط خلة سنان فى بوقه يتصل باتنين صحابة من ايام المدرسة بس صيع , يجيبوا العدة بتاعتهم ويطلعوا على مبنى الوزارة يفجروه بعد ما يقبضوا على الوزير ويحرقوه وهما بيشربوا سيجار من اللى فى اخره ورقه حمرا علشان نعرف انه كوبى .

فيلم صينى :

الشرطة تنسحب من الميدان والثوار يتهيألهم انهم نجحوا ,

يقومو باعتين ليهم مدرعات مستخبى فيها 200 الف واحد لابسين قمصان مشجرة

وكلهم بيقولو نياهاهاهاهاها يتخانقوا مع 200 الف واحد تانيين وفى الاخر ييجى واحد بيمشى على الحيطان يضرب الـ 400 الف ويخطف القائد ويقطعله قميصه يفاجأ بوشم النسر الاقرع , يقوم مصرخ وقاطع ودنه وبعدين قاتله بخنجر عليه نفس النسر .

وبعدين يروح للمعلم العجوز ياكل معاه رز بالعصاية بعد ما النبوءة بتاعته اتحققت

ويبقى هو المعلم الجديد .

فيلم هندى :

الشرطة تنسحب من الميدان ( موسقى تصويرية ) والثوار يتهيألهم انهم نجحوا

ويغنوا كلهم مع بعض ( موسيقى تصويرية تانى ) , تقوم الشرطة باعتالهم 200 الف جيب فيهم اغبى 200 الف عسكرى فى العالم ( موسيقى تصويرية تالت ) والعساكر طبعا هتضرب ضرب من اللى هو البوكس يطير 3 معاه , وطبعا الصوت بتاع البوكس هو نفس صوت الشلوت هو نفس صوت القلم وشغل تصميم المعارك العجيب ده والمخرج يركز على نقطة عرق نازلة من على وش البطل متفهمش ليه ,

وفى الاخر يقبضوا على رئيس الشرطة الفاسد ( موسيقى تصويرية رابع ) وهما

فى المحكمة السيناريو يفجرلنا المفاجأة ,

خالد سعيد يقتحم المحكمة على كرسى متحرك وهو معاه فيديو

لعملية التعذيب اللى حصلتله , والقاضى يحكم بعدها بالاعدام

وينفجر الحضور بالرقص والغناء بموسيقى تصويرية سادس

ولاحظوا ان مفيش موسيقى تصويرية خامس

فيلم ايطالى :

دخان سيجارة من ورى كرسى مش عارفين من اللى قاعد عليه

لان دراعه بس هو اللى باين وطبعا لابس خاتم شكله غريب, والكاميرا تلف

تجيب التلفزيون نلاقى ان الشرطة انسحبت من الميدان والثوار يتهيألهم انهم نجحوا ,

يقوم الدون كوندينيالى باعت واحد من رجالته يطقس يرجعله متخرشم ومعاه رسالة ,

يفتحها يلاقيها من الدون ماندولينى بيقوله ان الوقت ده بتاعه

واحسنله يسلم نفسه للاخوية الجديدة , يكتب رسالة يديها لألبيرتو يقوله وصلها للكبير , يدخل واحد الاوضة اللى كان فيها التلفزيون اول الفيلم

ويدى الراجل اللى على الكرسى الرسالة يقراها ويضحك

ويقول للى معاه : أغبياء لا يعرفون أننا من نتحكم فى مصير اللعبة

ويضحك ضحكات متقطعة شريرة والفيلم يخلص من غير مانعرف هو مين

فيلم فرنسى :

الشرطة ( الشيك جدا ) تنسحب من الميدان والثوار ( الشيك بردو ) يتهيألهم انهم نجحوا , ولمده ساعة ونص مشاهد مش فاهمين منها اى حاجه , واحد بيرسم قدام ايفل وواحد بيعزف تشيللو وواحده فقيرة قاعدة جنب الرصيف بس مش بتشحت ,

ييجى واحد لابس باريه ومشمر كم البلوفر يقول لاصحابه ان فى زخم فى الميدان الكبير , يجروا ورى بعض بالبسكلتات وبعدين صوت انفجارات متفهمش جت منين ,

وفى اخر مشهد تلاقى واحد مظهرش طول الفيلم قاعد مع واحده بياكلوا كرواسون فى مطعم وبيقولها الثورة نجحت .

فيلم روسى :

الشرطة تنسحب من الميدان والثوار يتهيألهم انهم نجحوا ,

ييجى رئيس الشرطة ورئيس الثوار وكل واحد فيهم ماسك قزازة فودكا

ويققروا يلعبوا روليت روسى على مصير الثورة , ومع اول ضغطة زناد رئيس الثوار يموت لان رئيس الشرطة كان صايع وكان حاشى المسدس كله , يطلع واحد تانى من الثوار معاه ار بى جيه يضربه فى وش رئيس الشرطة وفى الاخر تتدخل مدرعات عليها 200 الف جندى تحتل الميدان وتقتل الشرطة والثوار ويعلنوا استقلال الميدان .ويرفعوا علم عليه اى تلات الوان والسلام

فيلم جاسوسية بطولة نادية الجندى :

الثوار ينسحبوا من الميدان وجيش الدفاع يتهيأله انه نجح , يدخل بنحاييم على رئيس الموساد يلاقيه بيط.. بيعمل حمام , يطلع من الحمام وهو ناسى يقفل السوسته ومن غير ما يغسل ايده يقول لبنحاييم ايه الجديد ؟؟ يقوله ان الوضع تحت السيطرة وان الموساد عنده تفاصيل تحركات جبهة الثوار بالكامل , يتصل مدير الموساد بسكرتيره بنشولح يقوله حضرلى العربية علشان هروح , طبعا فى الوقت ده بتكون نادية الجندى بتصور كل المستندات فى مكتب المدير اللى فى البيت , وفجأة يدخل المدير يلاقيها

فى المكتب يبصلها بشك ويقولها بتعملى ايه ياحلوة ؟؟ تقوله مفيش يا روحى انا كنت بدور على فص توم وقع منى وانا بعمل الملوخية , يمسكها من توكة الحزام ويشد يقوم المايكروفيلم واقع , يبصلها بنظرة قاتله ويقولها توم ياروح خالتك ؟ويقوم مصرخ :

يا عزراااااااا وفجأة تفوق فى مكان مهجور وعزرا عمال يقلع فى ضوافرها

وهى بتصرخ صريخ مفتعل كالعادة ويقوم جايب مكنة ناسيت واخدلها شعرها زيرو وهى بتعيط وفجأة وبدون مقدمات عزرا يبصلها نظرة شهوانية وهى غرقانه فى دمها

تقوم مسهياه وساحبة المسدس من حزامه وضارباه وهى متكتفه وتفك نفسها وتطلع تاخد عربية وتسلم نفسها لكمال الشناوى اللى هنكتشف انه هو اللى كان عامل شخصية مورداخاى حنانيا سايس الجراج فى الموساد, وهى فى المطار تقابل واحد شبه وائل غنيم يقولها مش قلتلك ؟ هننجح بتويتر .. اما مدير الموساد اللى اكيد اسمه هيطلع ابو داوود فبينتحر فى مكتب فوقيه صورة جولدامائير . بعد ما فشل فى مهمة اخماد الثورة .

فيلم اخراج خالد يوسف :

الثوار بتعزم على الشرطة بحشيش , الامن المركزى بياخد الحشيش ويشربه

ويطلع واحد مسطول شبه عمرو عبدالجليل يعزم الامن على فرح جارتهم

اللى كان بيحبها واتجوزت واحد غنى ويحكيله قصة كفاح وظلم النظام ليه ,

الأمن المركزى يروح الفرح يشرب بيره ويسكر ويطلع واحد يغنى انا شارب 3 ريدبول وييجى 12 شيشة تفاح , غادة عبدالرازق بترقص مجاملة  وفى الكادر ناس مربية دقنها ماسكه نبابيت وكبيرهم بيقول لابد من أن نقاوم الفسق والفاسقين .. وعمرو عبدالجليل قاعد ياكل فى نفسه وفى الاخر يقوم يهجم على الكوشة يقتل العريس وفلاش باك سريع تلاقيه بيفتكر لقطات كان بيضرب فيها فى قسم شرطة والظابط بيطفى السجاير تحت باطه والظابط المقنع اللى مكتوب على صدره اخصائى أمن الدولة للتعذيب فى المقرات السرية  ويفتكر لما كان بياخد العروسة فى المقطم بالليل وبلاش اخوض فى اعراض الناس واكمل .. وترجع الكاميرا للفرح اللى بيبوظ والاهالى تطلع على العساكر تضربهم وتولع فى عربياتهم ويقفل الفيلم بمشاهد من الثورة والهتاف الشهير : الشعب يريد اسقاط النظام

فيلم انتاج السبكى :

الشرطة تنسحب من الميدان والثوار بيتهيألهم انهم نجحوا , حمادة هلال يظهر بيغنى الإلياذه بتاعت شهداء 25 يناير ماتوا فى احداث يناير , سعد الصغير يغازل دينا الرقاصة فى حارة شعبية ويقولها احنا بقينا بعد الثورة وابوكى هيوافق غصب عنه , تضحك ضحكة مايعة وتسيبه وتطلع على السلم يقابلها سليمان عيد متنح تقوم ضارباه بالقلم , ضياء الميرغنى قاعد على السطح مع حسن حسنى بيشربوا حشيش وبيتريقوا على حبيب العادلى , اسفاف لمدة ساعة وييجى مشهد محاكمة مبارك , علاء مرسى مولع سيجارة بانجو فى المحكمة جنبية حسن حسنى بيبص ناحية القفص , القاضى يدخل ويقول المتهم عنده حاجه عاوز يقولها ؟؟ يظهر واحد شبه مبارك يقول انه لم يكن ينتوى الترشح لفترة ثانية ويعيد خطاب اول فبراير .. سليمان عيد عينه تدمع وحسن حسنى يقول والله صعبت عليا ,علاء مرسى يحرج من الموقف الانسانى يرمى سيجارة البانجو ويعلو الهتاف فى القاعة : الشعب يريد عودة الرئيس , وينتهى الفيلم باغنية واحد مننا لعمرو دياب , وبعدين يظهر محمد السبكى نفسه ماسك صورة حمدين صباحى وبيقول ان ده شعار حملته , ويزعق بطريقته المشهورة لغاية ما يظهر المخرج في الكادر وهو بيقول ستوب ياحج محمد .

K@ReeM

ِشعب متدين

منذ عدة سنوات وفى جلسة ما على المقهى الذى اعتاد الجلوس عليه , كانت المقهى تحتفل
 بتركيب ( الوصلة ) التى تتيح لروادها مشاهدة القنوات المشفرة بسعر زهيد , اختلف الحاضرون على القناة مابين عمرو اديب والجزيرة و الآيه آر تى , واستقر الريموت كنترول على قناة ( شو موفيز ) الشهيرة ..
كان فيلم ( أوريجنال سن ) لانطونيو بانديراس وانجيلينا جولى هو المذاع , ثم خرجت صيحة من شخص ما فى المكان : ما تشيلوا الفيلم الزبالة ده , ده كله قباحة ..

كان يمكن لأى شخص رصد حالتين مختلفتين , اولهما حالة استهجان لان هناك شخص نكدى فضح سر الفيلم وحرمهم من المشاهدة , والأخرى كانت لشكر الرجل على موقفه المحافظ , وولادنا بتبوظ و هذا الحديث الذى لا ينتهى .. لكن الغريب فى الأمر ان الرجل نفسه عاد لخرطوم شيشته وأخذ يحكى لصديقه عن المشهد الذى سيجمع بانديراس مع جولى بتفاصيله , ثم أضاف جملة عبقرية جدا .. أصل احنا شعب متدين مينفعش نتفرج على المسخرة دى .. لكنه نسى للحظة انه قد حكى لصديقه تفاصيل التفاصيل عم سيحدث واخبر المقهى كلها انه فيلم قبيح , معنى ذلك انه شاهد الفيلم بتركيز كبير قبل ذلك ..

شعب متدين .. نحن فعلا شعب متدين

-        من يجلسون فى وقفة الاعياد يشربون الحشيش ثم يتوجهون بعد صلاة العيد للتحرش هم من شعب متدين فعلا .

-        من لا يأمن على زوجته او ابنته الخروج من المنزل فى اوقات معينة او من ركوب المواصلات العامة ليفاديها لمسات والسنة المتحرشين هو سلوك شعب متدين

-        احصائية جوجل تشير ان كلمة ( جنس ) هى الاكثر استخداما فى محرك البحث , هذا بالطبع دليل على الورع والتقوى .

-        عندما تتحول الفتاة لصاروخ وطلقة ومزة والشاب الى سيس وخرونج , هذا سلوك يعكس مستوى الحضارة الانسانية العملاق فى النفوس

-        لايهم أن تعيش أسرة بلا سقف , أو ان هناك أطفالا عراة , المهم ان يكون للضباط حرية اطالة لحاهم , وان تتستر الفاجرات بالزى الشرعى . المهم اخلاص النية .

سينفجر الآن احدهم غضبا محيلا كل اسباب العطن والبذائة الى شماعات مثل ان ازياء البنات فاضحة , الشباب لا يجد الزواج , ومسلسل الفقر والتعليم والصحة لينهى كلامه بأن النظام السابق هو المسئول .. نعم النظام السابق أعلن مسؤليته عن قولونى العصبى هذا الصباح على الجزيرة فلا داعى للجزع ..  ولكن فضلا قبل أن تحدثنى عن أزياء الفتيات حدثنى عن غض البصر , وعن نسبة التحرش فى انجلترا مقارنة بمصر مثلا لو قارنت ازياء آنسات لندن بآنسات عابدين والمنصورة و العصافرة ..

من غير الممكن أيضا أن نلقى باللوم على العامة فقط , ليسوا وحدهم من يتحمل مسؤولية الانحدار .. فمن يتحدثون باسم الدين هم أول من يسيئون إليه ,

-        عندما يكون اسلوب الدعاية لمرشح رئاسى هو وصم المنافسين بالالحاد وجعل من لم ينتخبه آثم , لتعلو حدة التوتر بعد اكتشاف انه من كبار الافاقين ليعلن نفس الملتحى الملاكى لفتاوى الدعاية ان الجهاد ضد الجيش هو سبيل الخلاص , وعندما تسيل الدماء يختفى صاحب الفتوى والمرشح الذى عجز عن اثبات جنسية والدته فيبادر باتباع أساليب عبور فيل المخالفة من فتحة ابرة القانون ويقيم دعوى بطلان اجراءات الاثبات وليس نفى الجنسية .. ويبقى سؤال القرن يطل برأسه دون خجل .. فين الجرين كارد يا عم الشيخ ؟ ناهيك عن فتوى بيبسى الشهيرة التى تجاهلت أصوله وتاريخ صناعته التى تسبق ولادة ديفيد بنجوريون نفسه .. الامر المضحك انه لو اعترف شخصيا بأنه كاذب وملفق ونصاب سيظل اتباعه اوفياء , لقد تعرضت لضغوط فاقت قدرتك لذلك احنيت رأسك للموجة . نحن معك وسنحيا زياطا وسنأكل دجاجا وسنرفع حديدا وسنحرز اهدافا .. انت بابا وماما وانور وجدى يا أسد .

-        عندما يقوم شخص آخر ممن يدعون التدين بمهاجمة كل قنوات الاعلام بلا هوادة , لتكتشف ان صاحب المحطة الفضائية التى ينشر من خلالها بذاءاته هو صاحب محطات غنائية وشركة تسجيلات صوتية , هذا يؤكد لك كم النفاق المتبع منهم , إنه يرضى أن يعمل فى قناة يبدو أن صاحبها يشعر بتأنيب الضمير فقام بشبه غسيل لأمواله باقامة محطة دينيه استأجر فيها بعض مدعى التقوى و أسماه اعلاما دينيا , الأمر الغريب الآخر أن هذه القنوات تحيا على اعلانات ( بير السلم ) مثل اللاصقة السحرية و أدوية الضعف الجنسى وطبيبك الخاص وشاى الدكتور حساسين .

-        الأفاقون فى هذا الزمان لا يتوارون خجلا , لذلك لا تستغرب أن أحدهم يبدأ إحدى فيديوهاته بقوله : أيها الداعرون , أيتها العاهرات .. ثم يستأنف حديثه بالصلاة على رسول الله صلى الله عليه وسلم , من يعارض الرئيس ليس إلا بعض الفئران والصراصير , من خرج فى مظاهرات ضده فدمه حلال , زميله الذى لا يقل عبقرية اعتبر خروج الفتاة للدراسة لا يجوز لو كانت المسافة اكثر من 25 كيلو مترا .. كأنه تناسى أننا فى القرن الواحد والعشرين ولم يلفت نظره اختراع اسمه الميكروباص وان مسافة مثل هذه يمكن قطعها فى مده لا تزيد عن بضع دقائق لو تم ازالة المطبات من الطرق .

-        مسلسل الاستهبال لايزال مستمرا ,  يعلن عبقرى آخر مدمرا لعلم رياضيات الاستثمار بالكامل نفاقا لجوقة الرئيس ان فوائد البنك الدولى لا تعدو كونها مصاريف ادارية , لكن لماذا لا يعتبر فوائد البنوك المصرية مصاريف ادارية ايضا ؟ الأمر يقودنى لفضح حالة من التربح باسم الدين تسمى بنوك المعاملات الاسلامية .. أى طالب لعوب فى كلية التجارة يعرف ان الفارق الوحيد بين البنوك العادية والاسلامية هو مسمى حساب الأرباح والخسائر فيسمونه فى البنوك العادية حـ / أرباح وخسائر , وفى البنوك الاسلامية حـ / المضاربة .. بغض النظر ان البنوك بجميع مسمياتها لا تخسر لكن امعن النظر فى طريقة احتساب الفائدة على المدخرات , فى البنوك العادية تكون نسبة ثابته حسب نوع حساب العميل , لكن فى البنوك الاسلامية هى نسبة شبه ثابته تتراوح ما بين 7.5 % و 10 % .. اذن بالله عليك ما هو الفارق بين التعاملات مع البنوك العادية ومن تدعى المعاملات الاسلامية ؟ ان الامر لا يعدو تجارة بالمسميات تهدف لاختراق حاجز الخوف عند البسطاء لا اكثر . ناهيك عن تجارة الفقر الانتخابية بتوزيع الزيت والسكر والمكرونة .

-        ماذا رأيت من الله حتى تكره شريعته ؟ لو سمعت مثل هذا الاستنكار لا تتعب نفسك بأكثر من فردة حذاء فى وجه صاحبه , ان الامر لا يتعلق بتطبيق الشريعة معشر المغفلين , لكنى لا اريد شريعة من سيد قطب والبنا وابناء الزمر . فى زمن ما كان فى مصر من يطلقون على أنفسهم الجماعات الاسلامية والسلفية الجهادية وفى رقابهم دماء أطفال كانت تموت بقنابل محشوة بالمسامير , فى رقابهم دماء رئيس دولة قتلوه بدعوى الكفر , رغم انه لا يوجد فى الشريعة ولا فى تفسير الأئمة الأربعة ولا فى تراث كبار علماء الازهر ما يعطى الحق لانسان فى نعت آخر بالكفر او قتله بدعوى الكفر

نحن لسنا متدينون للدرجة التى نحسب أنفسها عليها , ولا من يتحدثون عن الدين متدينون بالقدر الذى يحسبون انفسهم عليه , نحن باختصار تجار دين .. اغفلناه فى نفوسنا وأضحينا نراقب الآخرين كيف يمارسون الدين ونحاسبهم بالكفر والاخراج من الملة والنعت بالالحاد والزندقة والعهر , كما يقول الرائع الراحل دكتور مصطفى محمود نحن نقدس رجال الدين أكثر من الدين نفسه , ودعونى أضيف حتى لو كان هذا المتحدث بائع بطاطا .

وفى الختام لايمكننى ان اخفى رغبتى كلما شاهدت من يتحفوننا باسم الدين أن اقف دقيقة حداد على أرواح

كفار قريش .

K@ReeM