سينما 25 يناير ..Solo Comedy

الموضوع قديم نوعا ما , لكن اعادة نشره بناءا على رغبة البعض , وامعانا فى الكوميديا

===============

فيلم امريكى :

الشرطة تنسحب من الميدان والثوار يتهيألهم انهم نجحوا , يقومو باعتين ليهم مدرعات تقتحم الميدان وتاخد 200 الف اسير , يطلع واحد من الميدان يقول كلمتين فى الصميم وياخد 5 رجالة مسلحين بشوية اسلحة ليزر على خفيف ويطلعوا على وزارة الداخلية , يفك شفرة الباب الرئيسى بالفكاكة ويبطل مفعول

قنبلة فى السكة بالحظ واللى معاه طبعا بيرمو الحرس المقنع من الشبابيك

لغاية مايوصل للأوضة اللى فيها الـ 200 الف يحررهم ويخرج من المبنى

وهو مكتف وزير الداخلية ببلاستيك التغليف , ويحتفل مع رفاقه فى الميدان

وفجأة يكتشف انه كان بيحب واحدة من المخطوفين ويقوم لاطعها بوسه بريئة

الرقابة هتقصها طبعا .

فيلم مكسيكى :

الشرطة تنسحب من الميدان والثوار يتهيألهم انهم نجحوا ,

يقومو باعتين ليهم مدرعات مستخبية فى علب جيتار سودا تقتل 200 الف واحد ,

يقوم طالع واحد حاطط خلة سنان فى بوقه يتصل باتنين صحابة من ايام المدرسة بس صيع , يجيبوا العدة بتاعتهم ويطلعوا على مبنى الوزارة يفجروه بعد ما يقبضوا على الوزير ويحرقوه وهما بيشربوا سيجار من اللى فى اخره ورقه حمرا علشان نعرف انه كوبى .

فيلم صينى :

الشرطة تنسحب من الميدان والثوار يتهيألهم انهم نجحوا ,

يقومو باعتين ليهم مدرعات مستخبى فيها 200 الف واحد لابسين قمصان مشجرة

وكلهم بيقولو نياهاهاهاهاها يتخانقوا مع 200 الف واحد تانيين وفى الاخر ييجى واحد بيمشى على الحيطان يضرب الـ 400 الف ويخطف القائد ويقطعله قميصه يفاجأ بوشم النسر الاقرع , يقوم مصرخ وقاطع ودنه وبعدين قاتله بخنجر عليه نفس النسر .

وبعدين يروح للمعلم العجوز ياكل معاه رز بالعصاية بعد ما النبوءة بتاعته اتحققت

ويبقى هو المعلم الجديد .

فيلم هندى :

الشرطة تنسحب من الميدان ( موسقى تصويرية ) والثوار يتهيألهم انهم نجحوا

ويغنوا كلهم مع بعض ( موسيقى تصويرية تانى ) , تقوم الشرطة باعتالهم 200 الف جيب فيهم اغبى 200 الف عسكرى فى العالم ( موسيقى تصويرية تالت ) والعساكر طبعا هتضرب ضرب من اللى هو البوكس يطير 3 معاه , وطبعا الصوت بتاع البوكس هو نفس صوت الشلوت هو نفس صوت القلم وشغل تصميم المعارك العجيب ده والمخرج يركز على نقطة عرق نازلة من على وش البطل متفهمش ليه ,

وفى الاخر يقبضوا على رئيس الشرطة الفاسد ( موسيقى تصويرية رابع ) وهما

فى المحكمة السيناريو يفجرلنا المفاجأة ,

خالد سعيد يقتحم المحكمة على كرسى متحرك وهو معاه فيديو

لعملية التعذيب اللى حصلتله , والقاضى يحكم بعدها بالاعدام

وينفجر الحضور بالرقص والغناء بموسيقى تصويرية سادس

ولاحظوا ان مفيش موسيقى تصويرية خامس

فيلم ايطالى :

دخان سيجارة من ورى كرسى مش عارفين من اللى قاعد عليه

لان دراعه بس هو اللى باين وطبعا لابس خاتم شكله غريب, والكاميرا تلف

تجيب التلفزيون نلاقى ان الشرطة انسحبت من الميدان والثوار يتهيألهم انهم نجحوا ,

يقوم الدون كوندينيالى باعت واحد من رجالته يطقس يرجعله متخرشم ومعاه رسالة ,

يفتحها يلاقيها من الدون ماندولينى بيقوله ان الوقت ده بتاعه

واحسنله يسلم نفسه للاخوية الجديدة , يكتب رسالة يديها لألبيرتو يقوله وصلها للكبير , يدخل واحد الاوضة اللى كان فيها التلفزيون اول الفيلم

ويدى الراجل اللى على الكرسى الرسالة يقراها ويضحك

ويقول للى معاه : أغبياء لا يعرفون أننا من نتحكم فى مصير اللعبة

ويضحك ضحكات متقطعة شريرة والفيلم يخلص من غير مانعرف هو مين

فيلم فرنسى :

الشرطة ( الشيك جدا ) تنسحب من الميدان والثوار ( الشيك بردو ) يتهيألهم انهم نجحوا , ولمده ساعة ونص مشاهد مش فاهمين منها اى حاجه , واحد بيرسم قدام ايفل وواحد بيعزف تشيللو وواحده فقيرة قاعدة جنب الرصيف بس مش بتشحت ,

ييجى واحد لابس باريه ومشمر كم البلوفر يقول لاصحابه ان فى زخم فى الميدان الكبير , يجروا ورى بعض بالبسكلتات وبعدين صوت انفجارات متفهمش جت منين ,

وفى اخر مشهد تلاقى واحد مظهرش طول الفيلم قاعد مع واحده بياكلوا كرواسون فى مطعم وبيقولها الثورة نجحت .

فيلم روسى :

الشرطة تنسحب من الميدان والثوار يتهيألهم انهم نجحوا ,

ييجى رئيس الشرطة ورئيس الثوار وكل واحد فيهم ماسك قزازة فودكا

ويققروا يلعبوا روليت روسى على مصير الثورة , ومع اول ضغطة زناد رئيس الثوار يموت لان رئيس الشرطة كان صايع وكان حاشى المسدس كله , يطلع واحد تانى من الثوار معاه ار بى جيه يضربه فى وش رئيس الشرطة وفى الاخر تتدخل مدرعات عليها 200 الف جندى تحتل الميدان وتقتل الشرطة والثوار ويعلنوا استقلال الميدان .ويرفعوا علم عليه اى تلات الوان والسلام

فيلم جاسوسية بطولة نادية الجندى :

الثوار ينسحبوا من الميدان وجيش الدفاع يتهيأله انه نجح , يدخل بنحاييم على رئيس الموساد يلاقيه بيط.. بيعمل حمام , يطلع من الحمام وهو ناسى يقفل السوسته ومن غير ما يغسل ايده يقول لبنحاييم ايه الجديد ؟؟ يقوله ان الوضع تحت السيطرة وان الموساد عنده تفاصيل تحركات جبهة الثوار بالكامل , يتصل مدير الموساد بسكرتيره بنشولح يقوله حضرلى العربية علشان هروح , طبعا فى الوقت ده بتكون نادية الجندى بتصور كل المستندات فى مكتب المدير اللى فى البيت , وفجأة يدخل المدير يلاقيها

فى المكتب يبصلها بشك ويقولها بتعملى ايه ياحلوة ؟؟ تقوله مفيش يا روحى انا كنت بدور على فص توم وقع منى وانا بعمل الملوخية , يمسكها من توكة الحزام ويشد يقوم المايكروفيلم واقع , يبصلها بنظرة قاتله ويقولها توم ياروح خالتك ؟ويقوم مصرخ :

يا عزراااااااا وفجأة تفوق فى مكان مهجور وعزرا عمال يقلع فى ضوافرها

وهى بتصرخ صريخ مفتعل كالعادة ويقوم جايب مكنة ناسيت واخدلها شعرها زيرو وهى بتعيط وفجأة وبدون مقدمات عزرا يبصلها نظرة شهوانية وهى غرقانه فى دمها

تقوم مسهياه وساحبة المسدس من حزامه وضارباه وهى متكتفه وتفك نفسها وتطلع تاخد عربية وتسلم نفسها لكمال الشناوى اللى هنكتشف انه هو اللى كان عامل شخصية مورداخاى حنانيا سايس الجراج فى الموساد, وهى فى المطار تقابل واحد شبه وائل غنيم يقولها مش قلتلك ؟ هننجح بتويتر .. اما مدير الموساد اللى اكيد اسمه هيطلع ابو داوود فبينتحر فى مكتب فوقيه صورة جولدامائير . بعد ما فشل فى مهمة اخماد الثورة .

فيلم اخراج خالد يوسف :

الثوار بتعزم على الشرطة بحشيش , الامن المركزى بياخد الحشيش ويشربه

ويطلع واحد مسطول شبه عمرو عبدالجليل يعزم الامن على فرح جارتهم

اللى كان بيحبها واتجوزت واحد غنى ويحكيله قصة كفاح وظلم النظام ليه ,

الأمن المركزى يروح الفرح يشرب بيره ويسكر ويطلع واحد يغنى انا شارب 3 ريدبول وييجى 12 شيشة تفاح , غادة عبدالرازق بترقص مجاملة  وفى الكادر ناس مربية دقنها ماسكه نبابيت وكبيرهم بيقول لابد من أن نقاوم الفسق والفاسقين .. وعمرو عبدالجليل قاعد ياكل فى نفسه وفى الاخر يقوم يهجم على الكوشة يقتل العريس وفلاش باك سريع تلاقيه بيفتكر لقطات كان بيضرب فيها فى قسم شرطة والظابط بيطفى السجاير تحت باطه والظابط المقنع اللى مكتوب على صدره اخصائى أمن الدولة للتعذيب فى المقرات السرية  ويفتكر لما كان بياخد العروسة فى المقطم بالليل وبلاش اخوض فى اعراض الناس واكمل .. وترجع الكاميرا للفرح اللى بيبوظ والاهالى تطلع على العساكر تضربهم وتولع فى عربياتهم ويقفل الفيلم بمشاهد من الثورة والهتاف الشهير : الشعب يريد اسقاط النظام

فيلم انتاج السبكى :

الشرطة تنسحب من الميدان والثوار بيتهيألهم انهم نجحوا , حمادة هلال يظهر بيغنى الإلياذه بتاعت شهداء 25 يناير ماتوا فى احداث يناير , سعد الصغير يغازل دينا الرقاصة فى حارة شعبية ويقولها احنا بقينا بعد الثورة وابوكى هيوافق غصب عنه , تضحك ضحكة مايعة وتسيبه وتطلع على السلم يقابلها سليمان عيد متنح تقوم ضارباه بالقلم , ضياء الميرغنى قاعد على السطح مع حسن حسنى بيشربوا حشيش وبيتريقوا على حبيب العادلى , اسفاف لمدة ساعة وييجى مشهد محاكمة مبارك , علاء مرسى مولع سيجارة بانجو فى المحكمة جنبية حسن حسنى بيبص ناحية القفص , القاضى يدخل ويقول المتهم عنده حاجه عاوز يقولها ؟؟ يظهر واحد شبه مبارك يقول انه لم يكن ينتوى الترشح لفترة ثانية ويعيد خطاب اول فبراير .. سليمان عيد عينه تدمع وحسن حسنى يقول والله صعبت عليا ,علاء مرسى يحرج من الموقف الانسانى يرمى سيجارة البانجو ويعلو الهتاف فى القاعة : الشعب يريد عودة الرئيس , وينتهى الفيلم باغنية واحد مننا لعمرو دياب , وبعدين يظهر محمد السبكى نفسه ماسك صورة حمدين صباحى وبيقول ان ده شعار حملته , ويزعق بطريقته المشهورة لغاية ما يظهر المخرج في الكادر وهو بيقول ستوب ياحج محمد .

K@ReeM