خدعوك فقالوا .. هيحصل إضراب

دايما اى اتنين مخطوبين بيبقى بينهم مشاعر حراقة كده

كل نص ساعة يتصل بخطيبته يقولها وحشتينى

وان امكن هيتصل بيها كل دقيقتين

(( الحب وحش برضه ياجماعه ))

لدرجه ان الموضوع ممكن يتطور معاه ويوصل لانها تبقى عاده

ويفاجأ فى مره وهو بيتصل بيها يقولها وحشتينى

ترد عليه وتقوله حبيبى انت بتكلمنى ليه فى الموبايل

انا قاعدة جنبك على السفرة ..!!

انها الرومانسية الانسيابية

وبعد 5 سنين ... هنشوف مشهد مغاير تماما

انسان قاعد كرشة قدامه مترين وطبعا لابس

بنطلون البيجامه المخطط ابيض فى اخضر اللى كلنا عارفينه

واكيد هى هى نفس الفانلة الحمالات المتهالكة

والدقن الطويلة نسبيا لدرجه تخليه

كل دقيقتين يهرش فوق حنجرته

وقاعد ماسك الريموت على محطة ميلودى

بيستمتع مع كليب هيفاء الجديد

وعين فى التلفزيون وعين بتبص على مراته

اللى لابسه جلابية نانسى عجرم

فى كليب اه ونص وقامطه نفس الايشارب المهربد فوق دماغها

وتنبعث من حواليها روائح التوم والبصل

والاريال بقوة الحبيبات الفوارة

وهو فى خياله بيتحسر على منظرها اكيد

لانه بعد ماكان بيشوفها فيرجينا جميلة الجميلات

بقى بيشوفها أمينة رزق فى فيلم بائعة الخبز

واكيد هى كمان بتبصله نفس نظرة الحسرة

لانه معدش فى نظرها فارس احلامها

ولايرقى اصلا ليصبح دنجوان فى احدى عشوائيات فيلم حين ميسرة

ولكن .. هل الحب بينهم مات .؟؟؟ اكيد لأ

هو شبه مصدى لكن الحب لايموت .. فى بينهم تبلد وجمود عاطفى

لكن لايجرؤ احد الطرفين على الانسحاب من حياة التانى

وهى دى العلاقة اللى بين الشعب المصرى وحكومة نظيف

الشعب بيختلف معاها ويهتف ضد الغلاء وطوابير العيش

ومع ذلك اعلى من 85% من الشعب حياتهم

يوم 6 ابريل كانت طبيعية

ورفضوا فكرة الاعتصام والاضراب ..

ومعتقدش ان الناس كانت خايفة

من حكاية ان اى موظف هيغيب عن شغله فى اليوم ده هيتعرض

لجزاء 5أيام من مرتبه .. لان من امتى والمرتب بيكفى اصلا .؟؟

فمش هتفرق لما يتخصم منه 5 أيام كمان فى سبيل انه

يعتصم اعتراضا على الأسعار والاجور اللى ماشيين عكس بعض

وردا على وزير محترم قال ان زيادة الأسعار تواكب الاسعار العالمية

فلماذا لاتواكب المرتبات فى مصر أيضا الأجور العالمية .؟؟

وكمان اجندات الوزراء بعد اى تشكيل وزارى جديد

وماتحمل من انخفاضات فى البطالة وزيادة معدلات الانتاج

ونفرح جدا بالكلام ده ونهلل للعزم الشديد والقوة الحديد

انها الوزارة الشيفورلية اللى هتحل مشاكلنا ..

وتفوت وييجى غيرها مع نفس الكلام ونفس الاحلام

وبعد يوم 6 أبريل أظن ان غالبية الشعب لايريد التغيير

لكنه عاوز الاصلاح والتطوير فعليا .. مش بس أجندات

================

مش عارف ليه نفسى ابعث برسالة شكر لمؤلف فيلم

(( امبراطورية ميم ))

بطولة القديرة فاتن حمامة

لانه فعلا تنبأ بحاجه مهمة جداااااااا فينا كمصريين

لان فى الفيلم بعد صدام الاجيال بين القديرة فاتن حمامه

واولادها ونشوء حرب الديموقراطية واعلان انتخابات حرة ونزيهة

كل أولادها الشطار اختاروا ماما تانى .. برافو ياولاد



K@ReeM