ياللى من بين عنيكى النور شق وبرق
ولجل خاطرك القلب دق وخفق
سكنتى فيا .. وغبتى معرفش ليه
قاتلنى طول الانتظار وقرب يموتنى القلق
===========================
حبيت .. وأتارينى محبتش حد
وكنت عايش سر ميعرفوش أى حد
لما كانت جنبى رسمت حلم الحياة
ولما بعدت .... خفت ليكون بجد
=========================
شفتك بتضحكلى لاقيتنى يومها سعيد
قولت همشيلك .. ومرجعش تانى وحيد
قربت ..!!.. باين لأ مقربتش
مكنتش بمشى ! ولا أنت اللى كنت بعيد
=============================
قالوا بين اللقا والفراق قنطره
وفنار بنوره يلم شمل النطوره
لكن الحكاية ليها سر بسيط
مهما مشيت .. خطوتك بترجع ورى
=======================
ياه لو كنت موج وكان قلبك جزيرتى
أتوه وأرجع أنسى فيه غربتى وحيرتى
قلت لو أجرب وأشوف هشعر بإيه
روحت ولما جيت ... لاقيتك رحلتى
=========================
شوفتك لاقيت فيكى الأمل والدفا
تبتسمى يبقى الحزن زال واختفى
قربتى منى لكنى خوفت ألمسك
انتى بجد .؟؟ ولا هتبقى بردو مزيفة .؟
========================
يا نجمة بيكى اهتديت وليكى اتملكت
يا حلوه خلصت فيها الكلام والوقت
يا ورده نفسى أعرف رحيقك إيه
دنيت مليت قلبى بهواكى ... اتخنقت
======================
هو انتى شطى ولا دوامة غرق
انتى الأمان ولا احساس القلق
هو انتى شكى ولا خوفى ولا انتى مين
من كتر حيرتى بقيت فى هواكى متعلق
==========================
حلمت بيكى راكبه فوق أجمل فرس
تهتف حوالكى ناس وعلى صفين واقفين حرس
حاولت أنادى كتير بس خفت
صوتى يضيع وسط مليون سقفه وجرس
==========================
قطر داير مستنى آخر محطاته
غريب أو تايه أو هى إيه ذاته
قلب انكسر وزيه زى البشر
ولساه بيرحل مع إن كل ركابه ماتوا
=================
ورقة خدها الهوى للدوامات
مكتوب عليها كلام بقى ذكريات
لقاها طفل كرمشها ومشى
ويفيد بإيه الكلام لو صاحبه .. مات
=====================
زمان .. كانت صورنا فى البراويز
وسط الشجر فـ يوم شاتى ولذيذ
فات الزمن .. وصورتنا لسه شباب
وبقينا اللى كنا شباب .. عواجيز
====================
قبل ظهور أول خيوط النهار
والشمس واقفة قاتلها طول الانتظار
رسمت سهم قاصد ناحيك
شايل حروف الشوق من نور ونار
==============
K@ReeM
=============
جميع الحقوق محفوظة
تعرفون هذا لدرجة الملل , فلا داعى فى كل مره ان نذكر أنفسنا بذلك
No comments:
Post a Comment