وأعدوا .. فئات وعمال وتأسيسيه

ان كنت من أنصار مت بغيظك وهذا الهراء , فاغلق الصفحة من الآن

لأننى ببساطه أكتب هذه السطور ليس لقناعة الا لكى استفز ضيق صدرك وافقك أكثر

اغلقها الآن .. أو استمر ولكن تذكر أننى حذرتك

==================

دعونى اتخلى عن حرصى على استعمال الفصحى

أريد أن اكون أكثر أريحيه فى استفزاز الآخرين .. أعرف اننى شرير لا داعى لان تهمس بهذا الآن

ولكن ليه الإخوان ؟؟

* قالولنا مشاركة لا مغالبة , علشان كده قالوا هنترشح على 30% بقت 50% بقت 100% وخدوا

كل اللجان الفرعية والكتاتنى نجح بـ 399 صوت بفارق صوت واحد عن فتحى سرور

اللى كان بينجح ب 400 صوت . وده يخلينى أسال مش كان فى 88 واحد فى برلمان 2005 ؟

ادوا صوتهم لسرور ولا ده بردو كان تزوير ارادة ؟؟ولا كلام موافى صح ؟

كان في صفقه ولا ايه يا بديــــــــع ؟احم .. وديع , اقصد وديــــع

لدرجه خلت صبحى فلوطه يقول ان الاخوان لو رشحت كلب هينجح , وكان اول واحد يخسر

هو فلوطة شخصيا قصاد مين يا صبحبح !! حزب واااتنى ؟؟

ده يأكد حاجه بسيطه جدا , ان لو فى دورة بلاى ستيشن الاخوان هترشح ناس يلعبوها

علشان يكسبوا ويقفوا ورى الراجل اللى ماسك الريموت يهتفوا ..

ولو حد لعب بتشيلسى هتلاقى كادر اخوانى مع معتز الدمرداش بيشجب الاختيار ده

لان فى لاعب اسرائيلى اسمه بنعيون فى تشيلسى , وكادر اخوانى تانى مع منى الشاذلى

بينفى الكلام ده تماما وبيقول احنا مؤمنين بالحريات

فى الوقت اللى فيه كوادر تالته خالص بتوزع منشورات مقاطعة فانلات تشيلسى .

بس برضو ليه الإخوان ؟

* علشان عاوزين كل حاجة بالانتخاب , الديموكراسى - قذافية التعريف - لازم تطبق على

كل المناصب ومفيش انفراد بالسلطات تانى كل حاجه بالتصويت والاس ام اس,

حتى مدربين الدورى هيترفدوا ويبقوا بالانتخابات بردو ,

وتلاقى غزلان مرشح نفسه لتدريب الاهلى مكان جوزية , وتلاقيه واقف عالخط بيقول

لمحمد شوقى هتباصى وتلعب زمايلك ولا اطبق عليك اللائحة ؟؟

ايوة يعنى ليه الاخوان ؟؟

علشان ناس محترمة وبتحترم بعض , كلهم بيبوسوا ايد المرشد

لدرجة تخليك تعتقد انهم هيطلبوا مشروع قانون لاضافة قطعة مرشد فى الشطرنج

بيفضل بره لغاية ماترقى 4 عساكر ورى بعض ولما ينزل بيتحرك زى الوزير

فى مربعات خضرا مخصوص , ولما تكش الملك بيه متقولش كش خالص

بتقول الله اكبر ولله الحمد

مشاعر الابوة الجياشة دى بتهزنى من جوانياتى , بتفكرنى بناس كده الاخوان نفسهم

بيتريقوا عليهم لما بيقولوا على اللى بيحبوه اب ورمز ,

وقالولنا مش هندعم ابو الفتوح وفصلناه وهنفصل اللى يتشددله ..

البلتاجى اعلن دعمه ولسه موجود , ودعموا بنت أبو الفتوح فى انتخابات نقابة الصيادلة

شايفين قلب الام ؟؟ احم .. القلب الطيب ؟

سيبونا من الازدواجية

خلونا فى الاحترام , ناس زى دى لايمكن لايمكن تعمل حاجه غلط

وعاوزين يسحبوا الثقة من الحكومة * كده وكده يعنى * علشان الجنزورى

بيبوس ايد المجلس العسكرى , وعاوزين يجيبوا خيرت الشاطر اللى بيبوس ايد المرشد بردو

بس ايه جاب خيرت للجنزورى ؟؟ لا تجادل ولا تناقش يا أخ على ..

الراجل اتسجن ومعاهوش اى مؤهل سياسى غير كام سنة اعتقال اكيد هو ده احسن واحد

يكون رئيس وزارة , مش مهم انه مش عارف اى حاجة .. المهم انه محترم

طب بردو ليه الاخوان ؟؟

ناس عندها رؤية .. اختارت نص التأسيسية من البرلمان والنص التانى النص الاولانى

اللى هيختاره , البرلمان بتاعهم قمة الحنكة والخبرة , صحيح سويقة وسوق تلات

وكله اجلس ولوائح وهولز , لكن ده ميمنعش انهم بيعملوا فى صمت

بيعملوا ايه مش شغلك وملكش دعوة المهم انهم بيعملوا .. انت مال اهلك ؟

مش انتخبتهم ؟ اهمد بقى وسيب الناس تعمل ..

ماشى , بس ليه الاخوان ؟

ناس فاجرة وقادرة , بقالهم شهرين بيسحبوا الثقة من الحكومة اللى ماشية كمان شهر

فلما الحكومة تمشى لازم نشكر البرلمان انه سحب الثقة , ولازم نثق فى سلبة الاخوان

اللى استحملت السحب كل المدة دى من غير ماتتقطع .

الاخوان باختصار عجينة ميكافيللية جديدة

وميكافيللى لو كان عايش كان ألف فيهم كتاب جديد سماه انا والجماعه

وكان هيديه لوحيد حامد يعمله مسلسل

ولولا ان خريطة الاستفتاء كانت هتخدم مصالحهم على الأرض كان زمانهم مع 6 ابريل

كل يوم فى الشارع , واللى خلاهم يقبلوا الترشيح على تلت برلمان ممكن يلغيه

ويبقى مسمار جحا , وقانونا مش هيفتحوا بقهم باعتراض يخليك تتأكد

واللى يخليهم يغامروا بتشكيل لجنة تأسيسية للدستور بشروطها الحالية

ويكون الدستور معرض للرفض من الناس وبالتالى يكون من حق المجلس العسكرى

تشكيل التأسيسية الجديدة يخليك تتأكد .

ومش هستغرب لما مكتب الارشاد يطلع بيان شكر للمجلس على انقاذ الوطن

بتشكيله لجنة الدستور , ويطلع كام كادر يشكروا فيه وفى حكمته

تمهيدا لتمرير كام واحد فى اللجنة , او اعتماد كام نص بتوصية ارشادية

بس لو السيناريو ده نجح .. تفتكروا المجلس العسكرى هيوافق ؟؟

خصوصا بعد حوار المادتين 9 , 10 فى وثيقة السلمى ؟

أساتذة فى اهدار الفرص , جوع السلطة - مش ام طماطم - دايما بيخسرهم كل حاجه